ବର୍ଷା-ଅନୁଭବ ବିବାଦ: ପୁଣି ଥାନାରେ ଦ୍ୱାରସ୍ଥ ହେଲେ ବର୍ଷା
କଟକ (ବଡ଼ ଖବର ବ୍ୟୁରୋ): ପୁରୀଘାଟ ଥାନାର ଦ୍ୱାରସ୍ଥ ହେଲେ ଅଭିନେତ୍ରୀ ବର୍ଷା । ଶାଶୂଘର ଲୋକ ହଇରାଣ କରୁଥିବା ଅଭିଯୋଗ କଲେ ବର୍ଷା । ବେଡ ରୁମରେ ଟିଭି ଏବଂ ଏସି କନେକସନ କାଟିଥିବା ଅଭିଯୋଗ କରିଛନ୍ତି । ଏନେଇ ଏକ ଲିଖିତ ଅଭିଯୋଗ କରିଛନ୍ତି ବର୍ଷା । ପୁଣି ବର୍ଷା- ଅନୁଭବଙ୍କ ବିବାଦ ସାମ୍ନାକୁ ଆସିଛି । ଉଭୟ ଉଭୟଙ୍କୁ ମିଡିଆ ସାମ୍ନାରେ ଦୋଷାରୋପ କରୁଥିଲେ ହେଁ ଦୁଇଜଣଙ୍କ ମାମଲା କୋର୍ଟ ଯାଏଁ ଯାଇଥିଲା ।
ପତ୍ନୀ ବର୍ଷାଙ୍କୁ ଛାଡପତ୍ର ଦେବାପାଇଁ ପ୍ରଥମେ ଦିଲ୍ଲୀର ପଟିଆଲା ହାଉସକୋର୍ଟରେ ଆବେଦନ କରିଥିଲେ ଅଭିନେତା ତଥା ବିଜେଡି ସାଂସଦ ଅନୁଭବ ମହାନ୍ତି । ଏହାପରେ ଭରଣ ପୋଷଣ ପାଇଁ କଟକ ଫ୍ୟାମିଲି କୋର୍ଟ ଯାଇଥିଲେ ବର୍ଷା । ପରେ ଦିଲ୍ଲୀ ପଟିଆଲା ହାଉସକୋର୍ଟରେ ହୋଇଥିବା ମାମଲାକୁ କଟକ ଫ୍ୟାମିଲିକୋର୍ଟ ସ୍ଥାନାନ୍ତର ପାଇଁ ସୁପ୍ରିମକୋର୍ଟ ଯାଇଥିଲେ ବର୍ଷା । ଏହି ମାମଲାର ଶୁଣାଣି କରି କଟକକୁ ମାମଲା ସ୍ଥାନାନ୍ତର ହୋଇଥିଲା ।
ଦିଲ୍ଲୀର ପଟିଆଲା ହାଉସ କୋର୍ଟ ପରିବର୍ତ୍ତେ ମାମଲାର ଶୁଣାଣି କଟକର ଫ୍ୟାମିଲି କୋର୍ଟରେ ହେବ । ଆଉ ଏବେ ଘରେ ହଇରାଣ କରାଯାଉଥିବା ନେଇ ଥାନାରେ ପୁଣି ଅଭିଯୋଗ କରିଛନ୍ତି ବର୍ଷା ।