ଆଜି କେଉଁ ଜାଗାରୁ କେତେ ଟଙ୍କାର ବାଣ ଜବତ ହେଲା ପଢ଼ନ୍ତୁ ପୁରା ଖବର
ଭୁବନେଶ୍ୱର (ବଡ଼ ଖବର ବ୍ୟୁରୋ): ଚଳିତ ବର୍ଷ କରୋନା ମହାମାରୀକୁ ଦୃଷ୍ଟିରେ ରଖି ବାଣ ବିକ୍ରି ଓ ଫୁଟାଇବା ଉପରେ ସରକାର କଟକଣା ଜାରି କରିଛନ୍ତି । ହେଲେ କିଛି ଅସାଧୁ ବ୍ୟବସାୟୀ ଚୋରାରେ ବାଣ ବେପାର ଚଳାଉଥିବା ବେଳେ ତତ୍ପର ହୋଇଛି ପ୍ରଶାସନ । ଶନିବାର ରାଜ୍ୟର ବିଭିନ୍ନ ସ୍ଥାନରେ ଚଢ଼ାଉ କରି ପ୍ରଶାସନ ବିପୁଳ ବାଣ ଜବତ କରିଛି ।
ଯାଜପୁର ସହର ବାଲିପଡ଼ା ଛକରେ ଚୋରା ବାଣ ଦୋକାନରେ ଚଢ଼ାଉ କରି ପୋଲିସ ବିପୁଳ ବାଣ ଜବତ କରିଛି । ଯାଜପୁର ଥାନା ଅଧିକାରୀ ମାନସ ରଞ୍ଜନ ସାହୁଙ୍କ ନେତୃତ୍ୱରେ ଏକ ଟିମ୍ ଚଢ଼ାଉ କରିଥିଲା । ନବରଙ୍ଗପୁର ଜିଲ୍ଲା ଉମରକୋଟ ପୋଲିସ ସହରର ବିଭିନ୍ନ ସ୍ଥାନରେ ଚଢ଼ାଉ କରିଛି । ଦୁଇ ବ୍ୟବସାୟୀଙ୍କୁ ଗିରଫ କରିବା ସହ ଲକ୍ଷାଧିକ ଟଙ୍କାର ବାଣ ଜବତ କରାଯାଇଛି ।
ଖୋର୍ଦ୍ଧା ଜିଲ୍ଲା ବେଗୁନିଆ ପୋଲିସ ବି ଲକ୍ଷାଧିକ ଟଙ୍କାର ବାଣ ଜବତ କରିଛି । ବେଗୁନିଆ ଥାନାର ଭାରପ୍ରାପ୍ତ ଅଧିକାରୀ ରଶ୍ମିରଞ୍ଜନ ସାହୁଙ୍କ ନେତୃତ୍ୱରେ ଗଠିତ ଟିମ୍ ବେଗୁନିଆ ବ୍ଲକ କଣ୍ଟାବାଡ଼ ପଞ୍ଚାୟତ ମକୁନ୍ଦପୁର ଗ୍ରାମର କାଶୀନାଥ ମହାପାତ୍ରଙ୍କ ଘରେ ଚଢ଼ାଉ କରିଥିଲେ। ତାଙ୍କ ଘରୁ ବାଣ ଜବତ କରିବା ସହ କାଶୀନାଥଙ୍କୁ ଗିରଫ କରିଛି ପୋଲିସ ।
