ଶରଦ ପାୱାରଙ୍କୁ ବଡ଼ ଝଟକା, ଏନସିପି ନାଁ ଆଉ ଚିହ୍ନ ଅଜିତ ଗୋଷ୍ଠୀର

ମହାରାଷ୍ଟ୍ର (ବଡ଼ ଖବର ବ୍ୟୁରୋ): ମହାରାଷ୍ଟ୍ରରେ ଶରଦ ପାୱାର ନେତୃତ୍ୱାଧୀନ ଏନସିପିକୁ ବଡ ଝଟକା ଲାଗିଛି । ଅଜିତ ପାୱାରଙ୍କ ଏନସିପିକୁ ଅସଲ ଏନସିପି ବୋଲି ସ୍ୱୀକୃତି ଦେଇଛନ୍ତି ନିର୍ବାଚନ କମିଶନ । କମିଶନ କହିଛନ୍ତି, ସମସ୍ତ ତଥ୍ୟ ପ୍ରମାଣକୁ ଆଧାର କରି ଏହି ନିଷ୍ପତ୍ତି ନିଆଯାଇଛି । ଏବେ ଅଜିତ ପାୱାର ଗୋଷ୍ଠୀ ଏନସିପିର ନାଁ ଓ ନିର୍ବାଚନ ଚିହ୍ନ ବ୍ୟବହାର କରିପାରିବେ । ଏବେ ଶରଦ ପାୱାର ଗୋଷ୍ଠୀ ନୂଆ ଚିହ୍ନ ଓ ନାଁ ପାଇଁ ଆବେଦନ କରିବେ । ଏଥିପାଇଁ ବୁଧବାର ଦିନ ୩ଟା ଯାଏଁ ସମୟ ଦିଆଯାଇଛି ।

୬ ମାସରୁ ଅଧିକ ସମୟ ଧରି ଚାଲିଥିବା ଶୁଣାଣିରେ ବିବାଦ ନେଇ ୧୦ ଥର ବୈଠକ କରିଥିଲେ ନିର୍ବାଚନ କମିଶନ । କମିଶନ କହିଛନ୍ତି, ଅଜିତ ପାୱାର ଗୋଷ୍ଠୀ ପାଖରେ ଏନସିପିର ସଙ୍ଗଠନାତ୍ମକ ବହୁମତ ରହିଛି । ଶରଦ ପାୱାର ଗୋଷ୍ଠୀ ଏଥିରେ ଅସଫଳ ହୋଇଛି । ନିର୍ବାଚନ କମିଶନଙ୍କ ନିଷ୍ପତିକୁ ଚ୍ୟାଲେଞ୍ଜ କରି ଏନସିପିର ଶରଦ ପାୱାର ଗୋଷ୍ଠୀ ସୁପ୍ରିମକୋର୍ଟ ଯିବ ବୋଲି କହିଛି । ସେପଟେ ଏମପି ସୁପ୍ରିୟା ସୁଲେ କହିଛନ୍ତି ଶିବସେନାଙ୍କ ସହ ସେ ଯାହା କରିଥିଲେ, ସେ ମଧ୍ୟ ଆମ ସହ ସେପରି କରିଥିଲେ। କେବଳ ନାମ ବଦଳିଛି, ବିଷୟବସ୍ତୁ ସମାନ ରହିଛି।

ସୁଲେ କହିଛନ୍ତି ଶରଦ ପାୱାର ଶୂନରୁ ଏନସିପି ଆରମ୍ଭ କରିଥିଲେ। ତାଙ୍କ ପଛରେ କକା କିମ୍ବା ଦାଦା ନ ଥିଲେ। ନିର୍ବାଚନ ଆୟୋଗଙ୍କ ନିଷ୍ପତ୍ତିରେ ଏକ ଅଦୃଶ୍ୟ ଶକ୍ତିର ହାତ ରହିଛି। ବିଧାୟକଙ୍କ ସଂଖ୍ୟା ଅନୁଯାୟୀ ଦଳ ସ୍ଥିର ହୋଇନାହିଁ। ଅଦୃଶ୍ୟ ଶକ୍ତି ଯୋଗୁ ଏହି ବିଜୟ ହୋଇଛି। ଆମେ ପୁଣି ଛିଡା ହେବୁ। ଅଜିତ ପାୱାର ଦଳ ଏନସିପିର ନାମ ଏବଂ ଚିହ୍ନ ପାଇବା ପରେ ଶରଦ ଦଳର ନେତା ଜିତେନ୍ଦ୍ର ଆହ୍ବାଦ କଡ଼ା ପ୍ରତିକ୍ରିୟା ପ୍ରକାଶ କରିଛନ୍ତି। ସେ କହିଛନ୍ତି ବିଭୀଷଣ ପରି ସେ ଲଙ୍କା ଧ୍ୱଂସ କରିଛନ୍ତି। ଆମେ ଅଜିତ ପାୱାରଙ୍କୁ ଦୋଷୀ ବୋଲି କହୁଛୁ। ଅଜିତଙ୍କୁ ଦଳକୁ ନେଇ ତାଙ୍କୁ ଡେପୁଟି ସିଏମ କରିବା ଆମ ପକ୍ଷେ ଏକ ବଡ ଭୁଲ ଥିଲା।