୭ ବିଧାୟକଙ୍କୁ ଟିକେଟ ଦେଇନି ବିଜୁ ଜନତା ଦଳ

ଭୁବନେଶ୍ଵର (ବଡ଼ ଖବର ବ୍ୟୁରୋ): ୭ ବିଧାୟକଙ୍କୁ ଟିକେଟ ଦେଇନି ବିଜୁ ଜନତା ଦଳ । ଏଥର ନିର୍ବାଚନରେ ଅନେକ ନୂଆ ମୁହଁକୁ ନେଇ ମଇଦାନକୁ ଓହ୍ଲାଇଛି ଦଳ । ଏ ପର୍ଯ୍ୟନ୍ତ ଘୋଷଣା ହୋଇଥିବା ପ୍ରାର୍ଥୀଙ୍କ ମଧ୍ୟରୁ ୭ଜଣ ମହିଳାଙ୍କୁ ଟିକେଟ ମିଳିଥିବା ବେଳେ ୧୦ଜଣଙ୍କୁ ରିପିଟ କରାଯାଇଛି । ଆହୁରି ୪୮ଆସନରେ ପ୍ରାର୍ଥୀ ଘୋଷଣା ହେବାକୁ ବାକି ଅଛି । ତେବେ ଘୋଷଣା ହୋଇଥିବା ସିଟ ମଧ୍ୟରୁ ୭ ବିଧାୟକଙ୍କ ଟିକେଟ କାଟିଛି ଦଳ । ଦୁଇ ବରିଷ୍ଠ ନେତାଙ୍କ ପୁଅ, ଜଣେ ବିଧାୟକଙ୍କ ପତ୍ନୀଙ୍କୁ ଦଳ ପ୍ରାର୍ଥୀ କରିଛି । ମାହାଙ୍ଗାରେ ପ୍ରତାପ ଜେନାଙ୍କ ବଦଳରେ ତାଙ୍କ ପୁଅ ଅଙ୍କିତ ପ୍ରତାପ ଜେନା ଏବଂ ମୟୂରଭଞ୍ଜ ମୋରଡ଼ାରେ ରାଜକିଶୋର ଦାସଙ୍କ ପରିବର୍ତ୍ତେ ତାଙ୍କ ପତ୍ନୀ ପ୍ରୀତିଲତା କାନୁନଗୋ ଟିକେଟ୍ ପାଇଛନ୍ତି। ଟିକେଟ୍ କଟିଥିବା ଅନ୍ୟ ୫ ବିଧାୟକ ହେଲେ ସୋରର ପର୍ଶୁରାମ ଧଡ଼ା, ଆଠମଲ୍ଲିକର ରମେଶ ସାଏ, ଫୁଲବାଣୀର ଅଙ୍ଗଦ କହଁର, ତିର୍ତ୍ତୋଲର ବିଜୟ ଶଙ୍କର ଦାସ ଓ ପଟ୍ଟାଙ୍ଗୀର ପିତମ୍ ପାଢ଼ୀ । ଏହି ମାନଙ୍କ ଟିକେଟ କାଟିଛି ଦଳ । ତେବେ ଟିକେଟ କଟିଥିବାରୁ ଗତକାଲି ପର୍ଶୁରାମ ଧଡ଼ା ଦଳରୁ ଇସ୍ତଫା ଦେଇସାରିଛନ୍ତି । ପର୍ଶୁରାମ ଧଡାଙ୍କୁ ବାଦ ଦେଇ ସୋରରୁ ଏନଏସି ଅଧ୍ୟକ୍ଷ ମାଧବ ଧଡ଼ାଙ୍କୁ ଦଳ ଟିକେଟ ଦେଇଛି । ସେହିପରି ଆଠମଲ୍ଲିକରୁ ନଳିନୀକାନ୍ତ ପ୍ରଧାନ, ତିର୍ତ୍ତୋଲରୁ ପ୍ରଫେସର ରମାକାନ୍ତ ଭୋଇ, ପୂଲବାଣୀରୁ ନୂଆ ମୁହଁ ଭାବେ ଜୟଶ୍ରୀ କହଁର, ପଟ୍ଟାଙ୍ଗୀରୁ ପୂର୍ବତନ ବିଧାୟକ ପ୍ରଫୁଲ ପାଙ୍ଗୀଙ୍କୁ ମଇଦାନକୁ ଓହ୍ଲାଇଛି ବିଜେଡି ।