କାବୁଲରେ ବ୍ଲାକ ଆଉଟ

କାବୁଲ (ବଡ଼ ଖବର ବ୍ୟୁରୋ): ଆଫଗାନିସ୍ତାନରେ ବିଦ୍ୟୁତ ବିଭ୍ରାଟ । ତାଲିବାନ ଦଖଲ କରିବା ପରେ ସୃଷ୍ଟି ହୋଇଛି ବିଦ୍ୟୁତ ସମସ୍ୟା । ବାଦ ପଡ଼ିନି ରାଜଧାନୀ କାବୁଲ । କାବୁଲ ସମେତ ଅନ୍ୟାନ୍ୟ ପ୍ରଦେଶରେ ବିଦ୍ୟୁତ ବିଭ୍ରାଟ ହୋଇଛି । ଆଫଗାନିସ୍ତାନର ରାଷ୍ଟ୍ରାୟତ୍ତ ବିଦ୍ୟୁତ୍ କମ୍ପାନୀ ‘ଡା ଆଫଗାନିସ୍ତାନ ବ୍ରେଶନା ଶେରକାଟ (ଡିଏବିଏସ)’ ଏହି ସୂଚନା ଦେଇଛି । ସୂଚନା ଅନୁସାରେ ତାଲିବାନ ଦଖଲ ହେବା ପରଠାରୁ ଆଫଗାନିସ୍ତାନରେ ଖାଦ୍ୟ ଓ ପାନୀୟ ସଙ୍କଟ ଦେଖାଦେଇଛି ।

ଉତ୍ତର ଆଫଗାନିସ୍ତାନର ବାଗଲାନ୍ ପ୍ରଦେଶରେ ବୈଷୟିକ ସମସ୍ୟା ହେତୁ ବିଦ୍ୟୁତ୍ ଯୋଗାଣ ବ୍ୟାହତ ହୋଇଛି । ତେବେ ପାୱାର କମ୍ପାନୀ ଏହା ମଧ୍ୟ କହିଛି ଯେ ସେମାନଙ୍କର ବୈଷୟିକ କର୍ମଚାରୀମାନେ ଶୀଘ୍ର ସମସ୍ୟାର ସମାଧାନ ପାଇଁ କାର୍ଯ୍ୟ କରୁଛନ୍ତି । ବିଦ୍ୟୁତ୍ ଯୋଗାଣ ପାଇଁ ଆଫଗାନିସ୍ତାନ ମଧ୍ୟ ଏସିଆର ଦେଶ ଉପରେ ନିର୍ଭରଶୀଳ ବୋଲି ଚର୍ଚ୍ଚା ହେଉଛି । ଆଫଗାନିସ୍ତାନ ଏହାର ୮୦ ପ୍ରତିଶତ ବିଦ୍ୟୁତ୍ ଉଜବେକିସ୍ତାନ ଏବଂ ତାଜିକିସ୍ତାନରୁ ପାଇଥାଏ । ତେବେ ଚଳିତ ବର୍ଷ ଅଗଷ୍ଟରେ ତାଲିବାନ ଅକ୍ତିଆର ହେବା ପରଠାରୁ ତାଲିବାନ ଏହି ଦେଶର ଋଣ ପରିଶୋଧ କରିବାରେ ଅସମର୍ଥ ହୋଇଛି ।