କିଛି ସମୟ ମଧ୍ୟରେ କେନ୍ଦ୍ର-କୃଷକ ଆଲୋଚନା

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): କୃଷି ଆଇନ ପ୍ରତ୍ୟାହାର ଦାବିରେ ଆନ୍ଦୋଳନ ଚଳାଇଥିବା କୃଷକଙ୍କ ସହିତ ଆଜି କେନ୍ଦ୍ର ସରକାରଙ୍କ ପ୍ରତିନିଧି ଦଳ ସପ୍ତମ ପର୍ଯ୍ୟାୟ ଆଲୋଚନା କରିବେ । ଡିସେମ୍ବର ୩୦ରେ ହୋଇଥିବା ଷଷ୍ଠ ପର୍ଯ୍ୟାୟ ଆଲୋଚନାରେ କୃଷକଙ୍କ ୨ଟି ଦାବି ପୂରଣ ହୋଇଥିଲା । ଆଜି କୃଷି ଆଇନ ପ୍ରତ୍ୟାହାର ଓ ଏମଏସପି ପ୍ରସଙ୍ଗରେ ଆଲୋଚନା ହେବ । କୃଷି ଆଇନ ପ୍ରତ୍ୟାହାର ଦାବିରେ କୃଷକ ଅଟଳ ରହିଥିବାବେଳେ ସରକାର ଆଇନ ପ୍ରତ୍ୟାହାର କରିବାକୁ ମନା କରିଛନ୍ତି । ଉଭୟ ପକ୍ଷ ନିଜ ଦାବିରେ ଅଟଳ ରହିଛନ୍ତି ।

ଆଜିର ବୈଠକର ଗୁରୁତ୍ୱପୂର୍ଣ୍ଣ ଆଲୋଚନା ଉପରେ ସରକାର, ବିରୋଧୀ ଓ କୃଷକଙ୍କ ଉପରେ ନଜର ରହିଛି । ଅନ୍ୟପଟେ ସମାଧାନର ବାଟ ବାହାରିବା ନେଇ ଆଶାବାଦୀ ଅଛନ୍ତି କେନ୍ଦ୍ର ସରକାର । କୃଷି ଆଇନ ପ୍ରତ୍ୟାହାର ଦାବିରେ କୃଷକ ସଂଗଠନଗୁଡିକ ଚଳାଇଥିବା ଆନ୍ଦୋଳନ ଆଜି ୪୦ ଦିନରେ ପହଂଚିଛି । ଅସହ୍ୟ ଶୀତ କାକରରେ କୃଷକମାନେ ଆନ୍ଦୋଳନ ଚଳାଇଥିବାବେଳେ ଶନିବାର ରାତିରେ ଦିଲ୍ଲୀରେ ଲଗାଣ ବର୍ଷା ଯୋଗୁଁ ସେମାନଙ୍କ ଦୁର୍ଦ୍ଦଶା ଦ୍ୱିଗୁଣିତ ହୋଇଛି । ବର୍ଷାରୁ ରକ୍ଷା ପାଇବା ପାଇଁ କୃଷକମାନେ ତମ୍ବୁ ମଧ୍ୟରେ ଆଶ୍ରୟ ନେଇଛନ୍ତି । ପଞ୍ଜାବ ଓ ଦିଲ୍ଲୀ ସଂଲଗ୍ନ ତିନିଟି ସୀମାନ୍ତ ସ୍ଥାନ ସିଙ୍ଘୁ, ଟିକ୍ରି ଓ ଘାଜିପୁରରେ କୃଷକମାନେ ଆନ୍ଦୋଳନ ଚଳାଇଛନ୍ତି ।