ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ରୂପାନ୍ତିକରଣରେ ଅନିୟମିତତା ଅଭିଯୋଗରେ ବିକ୍ଷୋଭ ପ୍ରଦର୍ଶନ
ଚାନ୍ଦବାଲି (ବଡ଼ ଖବର ବ୍ୟୁରୋ): ଚାନ୍ଦବାଲି ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ରୂପାନ୍ତରିତ କାର୍ଯ୍ୟରେ ବ୍ୟାପକ ଅନିୟମିତତା ହୋଇଥିବା ଅଭିଯୋଗ କରି ବିଜେପି ଯୁବ ମୋର୍ଚ୍ଚା ପକ୍ଷରୁ ସୋମବାର ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ର ପରିସରରେ ବିକ୍ଷୋଭ ପ୍ରଦର୍ଶନ କରିବା ସହିତ ଉଚ୍ଚ ସ୍ତରୀୟ ତଦନ୍ତ କରିବାକୁ ଦାବି କରିଛନ୍ତି। ନୂତନ ମୁଖ୍ୟମନ୍ତ୍ରୀଙ୍କ ନିକଟକୁ ଅଭିଯୋଗ ପ୍ରେରଣ କରାଯାଇଛି। କେଉଁ ପରିସ୍ଥିତିରେ ବିନା ଟେଣ୍ଡରରେ କୋଟି କୋଟି ଟଙ୍କାର କାର୍ଯ୍ୟ କରାଯାଇଛି ବୋଲି ପ୍ରଶ୍ନ ଉଠିଛି।
ଗୋଷ୍ଠୀ ସ୍ବାସ୍ଥ୍ୟ କେନ୍ଦ୍ର ପରିସରରେ କିଛି ବର୍ଷ ତଳେ ନିର୍ମାଣ ହୋଇଥିବା ଦୁଇ ମହଲା ବିଶିଷ୍ଟ ଗୃହ ଗୁଡ଼ିକୁ ଭାଙ୍ଗି ବିଧିବଦ୍ଧ ଯୋଜନା କରାନଯାଇ ରୂପାନ୍ତରିତ କାର୍ଯ୍ୟ ପଛରେ କଣ ଉଦେ୍ଦଶ୍ୟ ବୋଲି ବିଜେପି ଯୁବ ନେତା ମାନେ ପ୍ରଶ୍ନ କରିଛନ୍ତି। ଅନାବଶ୍ୟକ ଭାବେ ବ୍ୟବହାର ଉପଯୋଗୀ ଗୃହ ଗୁଡ଼ିକୁ ଭଙ୍ଗା ନଯାଇ ଅନ୍ୟ ଉଦେ୍ଦଶ୍ୟରେ ବ୍ୟବହାର ହୋଇ ପାରିଥାଆନ୍ତା ବୋଲି ବିଜେପି ଯୁବ ମୋର୍ଚ୍ଚା ସଭାପତି ସୁଶାନ୍ତ ମହାନ୍ତି ଯୁକ୍ତି ଦର୍ଶାଇ ଥିଲେ। ଏସବୁର ତଦନ୍ତ କରାଗଲେ ରୂପାନ୍ତରିତ କାର୍ଯ୍ୟରେ ହୋଇଥିବା ଅନିୟମିତତା ପଦାକୁ ଆସିପାରିବ ବୋଲି ବରିଷ୍ଠ ବିଜେପି ନେତା କାହ୍ନୁ ଚରଣ ବେହେରା କହିଛନ୍ତି ।