କେନ୍ଦ୍ର କ୍ୟାବିନେଟ କମିଟିରେ ପରିବର୍ତ୍ତନ: ଦୁଇଟି କମିଟିରେ ଅଶ୍ୱିନୀ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ ): କେନ୍ଦ୍ର ସରକାର ଶକ୍ତିଶାଳୀ କ୍ୟାବିନେଟ୍ କମିଟି ଗଠନ କରିଛନ୍ତି । ସଂସଦର ବର୍ଷାକାଳୀନ ଅଧିବେଶନ ପୂର୍ବରୁ କ୍ୟାବିନେଟ୍ କମିଟିରେ ପରିବର୍ତ୍ତନ କରାଯାଇଛି । ଜୁଲାଇ ୧୯ରୁ ଅଗଷ୍ଟ ୧୩ ପର୍ଯ୍ୟନ୍ତ ବର୍ଷାକାଳୀନ ଅଧିବେଶନ ବସିବ । ଏହା ପୂର୍ବରୁ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂଙ୍କ ନେତୃତ୍ୱରେ ସଂସଦୀୟ ବ୍ୟାପାର କମିଟିରେ ଅଦଳବଦଳ କରାଯାଇଛି । ପ୍ରତିରକ୍ଷା ସମ୍ପର୍କିତ କ୍ୟାବିନେଟ୍ କମିଟିରେ କେନ୍ଦ୍ରମନ୍ତ୍ରୀ ବୀରେନ୍ଦ୍ର କୁମାର, କିରନ୍ ବିରଜୁ, ଅନୁରାଗ ସିଂ ଠାକୁରଙ୍କୁ ସାମିଲ୍ କରାଯାଇଛି ।
କେନ୍ଦ୍ରମନ୍ତ୍ରୀ ସ୍ମୃତି ଇରାନି, ଭୁପେନ୍ଦ୍ର ଯାଦବ, ସରବାନନ୍ଦ ସୋନେୱାଲାଙ୍କୁ ପ୍ରଧାନମନ୍ତ୍ରୀଙ୍କ ନେତୃତ୍ୱରେ ଗଠିତ ରାଜନୈତିକ ବ୍ୟାପାର କମିଟିରେ ସାମିଲ୍ କରାଯାଇଛି । ପ୍ରାଧାନମନ୍ତ୍ରୀଙ୍କ ନେତୃତ୍ୱରେ ପୁଞ୍ଜି ବିନିଯୋଗ ଏବଂ ବିକାଶ ବ୍ୟାପାର କମିଟିରେ କେନ୍ଦ୍ରମନ୍ତ୍ରୀ ନାରାୟଣ ରାଣେ, ଜ୍ୟୋତିରାଦିତ୍ୟ ସିନ୍ଧିଆ, ଅଶ୍ୱିନୀ ବୈଷ୍ଣବଙ୍କୁ ସାମିଲ୍ କରାଯାଇଛି । ନିଯୁକ୍ତି ଓ ଦକ୍ଷତା ବିକାଶ କ୍ୟାବିନେଟ୍ କମିଟିରେ କେନ୍ଦ୍ରମନ୍ତ୍ରୀ ଅଶ୍ୱିନୀ ବୈଷ୍ଣବ, ଭୂପେନ୍ଦ୍ର ଯାଦବ, ରାମଚନ୍ଦ୍ର ପ୍ରସାଦ ସିଂ, ଜି କିଶାନ ରୋଡ୍ଡୀଙ୍କୁ ନୂତନ ସଦସ୍ୟ ଭାବେ ସାମିଲ୍ କରାଯାଇଛି । ତେବେ ଦେଶର ସୁରକ୍ଷା ସମ୍ପର୍କିତ କ୍ୟାବିନେଟ୍ କମିଟିରେ କୌଣସି ପରିବର୍ତ୍ତନ ହୋଇନାହିଁ ।