ଭୁଶୁଡ଼ିଲା ସୁରକ୍ଷା ବନ୍ଧ
ଛତ୍ରପୁର (ବଡ଼ ଖବର ବ୍ୟୁରୋ): ଗଞ୍ଜାମ ଜିଲ୍ଲାର ସଦର ମହକୁମା ଛତ୍ରପୁର ଏନ୍ଏସିରେ ଥିବା ବ୍ରିଟିଶ ଅମଳର ପିଲିବନ୍ଧର ନବୀକରଣ ଓ ସୌନ୍ଦର୍ୟ୍ୟକରଣ କାର୍ଯ୍ୟ ହୋଇଥିବା ନିମ୍ନମାନର କାମ ଲଗାଣ ବର୍ଷା ପରେ ପଦାରେ ପଡିଛି । ଏହି ସୌନ୍ଦର୍ୟ୍ୟକରଣ ପ୍ରକଳ୍ପରେ ମାତ୍ର ବର୍ଷକ ତଳେ ନିର୍ମିତ ଗାର୍ଡୱାଲ ଗୁରୁବାର ଧସିଯାଇଛି । ବର୍ଷକ ତଳେ ନୂଆ କରି ଉକ୍ତ ଗାର୍ଡଓ୍ବାଲ ଜନସାଧାରଣଙ୍କ ସୁରକ୍ଷା ଓ ସକାଳ ଓ ସନ୍ଧ୍ୟା ସମୟରେ ପରିଭ୍ରମଣ ଓ ବ୍ୟାୟାମ କରୁଥିବା ଲୋକଙ୍କ ପାଇଁ ନିର୍ମାଣ କରାଯାଇଥିଲା । ଏବେ ନିମ୍ନମାନର କାମ ଯୋଗୁ ଉକ୍ତ ଗାର୍ଡଓ୍ବାଲ ଧସିଯାଇଛି ।
ସୂଚନାଯୋଗ୍ୟ, ବ୍ରିଟିଶ ଅମଳର ପିଲିବନ୍ଧ ଓ ଏହାର ସଂଲଗ୍ନ ପାର୍କ ଦୀର୍ଘବର୍ଷ ଧରି ପରିତ୍ୟକ୍ତ ଅବସ୍ଥାରେ ରହିଥିଲା । ଉକ୍ତ ପିଲିବନ୍ଧର ସୌନ୍ଦର୍ୟ୍ୟକରଣ ଓ ପାର୍କର ଆଧୁନିକୀକରଣ କାର୍ୟ୍ୟ ଗତ ୨ ବର୍ଷ ତଳେ ଆରମ୍ଭ ହୋଇଥିଲା । ବର୍ତ୍ତମାନ ସୁଦ୍ଧା ଏହି କାର୍ୟ୍ୟ ସରିନି । ବ୍ରିଟିଶ୍ ଶାସନ କାଳରେ ଆର୍ଥର ପୁଲି ନାମକ ଶାସକଙ୍କ ଅମଳରେ ଉକ୍ତ ବନ୍ଧ ଖନନ ହୋଇଥିଲା। ତାଙ୍କ ନାମରେ ଏହି ବନ୍ଧର ନାଁ ପିଲିବନ୍ଧ ରଖାଯାଇଛି ।