ଆଉ ଚଳିବନି ଦାଦାଙ୍କ ରାଜୁତି
ଭୁବନେଶ୍ୱର, (ବଡ଼ ଖବର ବ୍ୟୁରୋ): ଅଶାନ୍ତ ହେଉଛି ରାଜଧାନୀ। ସବୁଠି ଚାଲିଛି ଗୁଣ୍ଡାଗର୍ଦ୍ଦି। ଲୋକାଲ ଦାଦାଙ୍କ କୃପା ନ ହେଲେ କିଛି କରିହେଉନି। ଛୋଟ ପାନ ଦୋକାନଠାରୁ ଆରମ୍ଭ କରି ଜମି କିଣା ପର୍ଯ୍ୟନ୍ତ ସବୁଠି ଆଦାୟ ହେଉଛି ଦାଦାବଟି। ଭୁବନେଶ୍ୱର ସହର ସମେତ ଉପକଣ୍ଠ ଅଞ୍ଚଳରେ ଏହି ଦାଦାମାନଙ୍କ ଉତ୍ପାତ ଜନସାଧାରଣଙ୍କୁ ଅତିଷ୍ଠ କଲାଣି। ଏନେଇ ଥାନାକୁ ଅଭିଯୋଗ ଆସିଲେ ମଧ୍ୟ ଅଧିକାଂଶ କ୍ଷେତ୍ରରେ ପୋଲିସ ନିରବ ରହିଯାଉଛି।
ଏବେ କିନ୍ତୁ ଦାଦାଙ୍କୁ ସାବାଡ଼ କରିବାକୁ ଅଣ୍ଟା ଭିଡ଼ିଛି କମିଶନରେଟ ପୋଲିସ। ଜନସାଧାରଣଙ୍କୁ ଆତଙ୍କିତ କରି ରଖିଥିବା ତଥାକଥିତ ଦାଦାମାନଙ୍କ ବିରୋଧରେ ଆବଶ୍ୟକ ପଡ଼ିଲେ ଏନ୍ଏସ୍ଏ ବଳରେ ମାମଲା ରୁଜୁ ହେବ। ଆଜି ପୋଲିସ ସେବା ଭବନରେ ବସିଥିବା ଏକ ଗୁରୁତ୍ୱପୂର୍ଣ୍ଣ ବୈଠକରେ ଏହି ‘ଦାଦା’ମାନଙ୍କୁ ଖୋଜି ସାବାଡ୍ କରିବାକୁ ସମସ୍ତ ଇନ୍ସପେକ୍ଟରମାନଙ୍କୁ ନିର୍ଦ୍ଦେଶ ଦେଇଛନ୍ତି ପୋଲିସ କମିଶନର ସୁଧାଂଶୁ ଷଡ଼ଙ୍ଗୀ। ଇନ୍ସପେକ୍ଟରମାନଙ୍କୁ କୁହାଯାଇଛି ଯେ ସେମାନେ ନିଜ ନିଜ ଥାନା ଅଞ୍ଚଳରୁ ଦାଦାବଟି ଆଦାୟ କରୁଥିବା ଯୁବକଙ୍କୁ ଚିହ୍ନଟ କରିବେ। ବାରମ୍ବାର ଅଭିଯୋଗ ଆସୁଥିବା ଦାଦାଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରିବେ।