ଆବାସ ଯୋଜନା ଡମୁଣୀଙ୍କ ଲାଗି ସାତସପନ

ଜଗନ୍ନାଥପ୍ରସାଦ (ବଡ଼ ଖବର ବ୍ୟୁରୋ): ଗରୀବ ଲୋକଙ୍କ ଲାଗି ସରକାର ଘୋଷଣା କରିଛନ୍ତି ଆବାସ ଯୋଜନା । ମାତ୍ର ପ୍ରକୃତ ହିତାଧିକାରୀ ଏହି ଯୋଜନାରୁ ବାଦ ପଡୁଛନ୍ତି । ଗଞ୍ଜାମ ଜିଲ୍ଲା ଜଗନ୍ନାଥପ୍ରସାଦ ବ୍ଲକ ବାସୁଦେବପୁର ଗାଁରେ ଦେଖିବାକୁ ମିଳିଛି ଏହାର ଜ୍ୱଳନ୍ତ ଉଦାହରଣ । ବାସୁଦେବପୁର ଗାଁର ଡମୁଣୀ ନାୟକ । ବୟସ ୭୦ ଛୁଇଁଲାଣି । ସ୍ୱୀମୀ ବାଜିଆ ନାୟକ ଓ ଭେଣ୍ଡିଆପୁଅ ଆରପାରିକୁ ଚାଲିଯାଇଛନ୍ତି । ଝିଅକୁ ବାହା ଦେବା ପରେ ପାଖରେ କେହି ନାହାନ୍ତି । ଭାଗ୍ୟ ଓ ଭଗବାନଙ୍କ ଭରସାରେ ଡମୁଣୀ ।

ଭଙ୍ଗା ଦରରା ଘରେ ଏକାକୀ ଜୀବନ ବିତାଉଛନ୍ତି ଡମୁଣୀ । ଝାଟିମାଟିର ଚାଳଘର କେତେବେଳେ ଯେ ଭୁଶୁଡି ପଡିବ କହିହେଉ ନାହିଁ । ବର୍ଷା ହେଲେ ଘରେ ଗଳୁଛି ପାଣି । ଅଧାଦିନ ରାତି ଅନିଦ୍ରା ହେବାକୁ ପଡୁଛି । ମୂଲ ମଜୁରି ଲାଗି ଯାହା ରୋଜଗାର କରନ୍ତି ସେତିକି ଚଳିବାକୁ ନିଅଣ୍ଟ । ନିଜ ଦୁଃଖ ଦୁର୍ଦ୍ଦଶା ସରପଞ୍ଚଙ୍କଠାରୁ ଆରମ୍ଭ କରି ବିଡିଓଙ୍କୁ ଜଣାଇଥିଲେ ସୁଦ୍ଧା ଫଳାଫଳ ଶୂନ । ପକ୍କାଘର ଖଣ୍ଡେ ମିଳିଲେ ବାକି ଜୀବନ ଟିକେ ଭଲରେ କାଟିଦିଅନ୍ତି ବୋଲି କହିଛନ୍ତି ଡ଼ମୁଣୀ ।