ଅଭିଯୋଗ କଲେ କେହି ଶୁଣୁନାହାନ୍ତି
କାକଟପୁର (ବଡ଼ ଖବର ବ୍ୟୁରୋ): ସାଧାରଣତଃ ମନ୍ତ୍ରୀଙ୍କୁ ଅଭିଯୋଗ କଲେ ସମସ୍ୟାର ସମାଧାନ ହୋଇଥାଏ । ମାତ୍ର କାକଟପୁରରେ ଏହାର ବ୍ୟତିକ୍ରମ ଦେଖିବାକୁ ମିଳିଛି । ମରଣଜନ୍ତା ପାଲଟିଛି କାକଟପୁର-ବଇତକୁଦ ରାସ୍ତା । ୨୦୧୮ରେ ପ୍ରଧାନମନ୍ତ୍ରୀ ସଡ଼କ ଯୋଜନାରେ କାକଟପୁର-କୁଣ୍ଡେଇ ଭାୟା ବୋଇତକୁଦ ରାସ୍ତାକାମ ଆରମ୍ଭ ହୋଇଥିଲା । ଧାର୍ଯ୍ୟ ସମୟର ବର୍ଷେ ବିତିକାବୁ ବସିଲାଣି, ଏଯାଏଁ ସରୁନି କାମ । ବିଭିନ୍ନ ସ୍ଥାନରେ ଜବରଦଖଲ ଉଚ୍ଛେଦ କରାଯାଇ ନାହିଁ । ରାସ୍ତାର ୧୦୦ ମିଟର ଖାଲଖମାରେ ପରିପୂର୍ଣ୍ଣ । ଅସରାଏ ବର୍ଷା ହେଲେ ରାସ୍ତାରେ ପାଣିଜମି ରହୁଛି । ଯାତାୟତ ଠପହୋଇ ଯାଉଛି । ଏନେଇ ସ୍ଥାନୀୟ ବିଧାୟକ ତଥା କ୍ରୀଡାମନ୍ତ୍ରୀଙ୍କଠାରୁ ଆରମ୍ଭ କରି ବିଭାଗୀୟ ଅଧିକାରୀଙ୍କ ନିକଟରେ ବାରମ୍ବାର ଅଭିଯୋଗ ପରେ ମଧ୍ୟ ସୁଫଳ ମିଳୁନାହିଁ ବୋଲି ସ୍ଥାନୀୟ ଲୋକମାନେ କହିଛନ୍ତି ।