ମହାପ୍ରଭୁଙ୍କ ଜନ୍ମବେଦିକୁ ଅବମାନନା
ପୁରୀ(ବଡ଼ ଖବର ବ୍ୟୁରୋ): ମହାପ୍ରଭୁଙ୍କ ଜନ୍ମବେଦି ଶ୍ରୀଗୁଣ୍ଡିଚା ମନ୍ଦିର ଭିତର ବେଢାରେ ଡ୍ରିଲ ମେସିନ ଲଗାଇ ଚଟାଣ ପଥର ଖୋଳାଯାଉଛି । ଶ୍ରମିକ ମାନେ ଚପଲ ପିନ୍ଧି ଭିତର ବେଢା ଏବଂ ଗୁଣ୍ଡିଚା ମନ୍ଦିର ଭିତରେ କାମ କରୁଛନ୍ତି । ଏହି ଘଟଣା ଦୃଷ୍ଟିକୁ ଆସିବାପରେ ସହରରେ ହଇଚଇ ସୃଷ୍ଟି ହୋଇଛି । ସାମାଜୀକ ଗଣମାଧ୍ୟମରେ ମଧ୍ୟ ଏହି ପ୍ରସଙ୍ଗକୁ ନେଇ ବିବାଦ ସୃଷ୍ଟି ହୋଇଛି । ଶନିବାର ଜିଲ୍ଲାପାଳ ଘଟଣା ସ୍ଥଳରେ ପହଞ୍ଚି ସ୍ଥିତି ଅନୁଧ୍ୟାନ କରିଛନ୍ତି । ତେବେ ରାଜଧାନୀର ଏକ ସଂଗଠନ ଏହି କାର୍ଯ୍ୟ କରୁଥିବାର ଜଣାପଡିଛି ।
ଶ୍ରୀଗୁଣ୍ଡିଚା ମନ୍ଦିର ଭିତର ବେଢାର ପ୍ରବେଶ ପଥ କଡରୁ ଚଟାଣର ପଥର ବଦଳାଇବାକୁ ଏହି ସଂଗଠନକୁ ଶ୍ରୀମନ୍ଦିରର ପ୍ରଶାସନ ନିୟୋଜିତ କରିଥିବା ଖବର ମିଳିଛି । ଶ୍ରୀମନ୍ଦିର ସମେତ ଅନେକ ସରକାରୀ ଅନୁଷ୍ଠାନକୁ ଏହି ସଂଗଠନ ସେବା ଯୋଗାଉଛି । ତେବେ ସହରବାସୀ ଏବଂ ଭକ୍ତମାନେ ପ୍ରଶ୍ନ ଉଠାଉଛନ୍ତି ମନ୍ଦିର ଭିତରକୁ କେମିତି ଚପଲ ପିନ୍ଧି ପ୍ରବେଶ କଲେ । ଯେତେବେଳେ କି ଚପଲ ପିନ୍ଧି ପ୍ରବେଶ ନକରିବା ପାଇଁ କଟକଣା ରହିଛି । କଣ ଏହି କଟକଣା ବିଷୟରେ ସଂଗଠନ ଅବଗତ ନାହିଁ ନା ସଂଗଠନ କ୍ଷମତାର ଦୁରୁପଯୋଗ କରୁଛି ବୋଲି ସହରବାସୀ ପ୍ରଶ୍ନ କରିଛନ୍ତି ।