ଜଳୁଛି ମାର୍କେଟ କମ୍ପ୍ଲେକ୍ସ
ରାଇରଙ୍ଗପୁର, (ବଡ଼ ଖବର ବ୍ୟୁରୋ): ରାଇରଙ୍ଗପୁର ସହରରେ ଭୟାବହ ଅଗ୍ନିକାଣ୍ଡ । ସହରର ମୁଖ୍ୟ ଗୋଲେଇ ଛକ ନିକଟ ଫ୍ରେଣ୍ଡସ କର୍ଣ୍ଣର ମାର୍କେଟ କମ୍ପ୍ଲେକ୍ସ ପୋଡିଯାଇଛି । ଜଳିଗଲା କୋଟିଏ ଟଙ୍କାର ସାମଗ୍ରୀ । ବୁଧବାର ରାତି ପ୍ରାୟ ସାଢ଼େ ୨ଟାରେ ଏହି ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି । ସ୍ଥାନୀୟ ଲୋକଙ୍କ କହିବା ଅନୁଯାୟୀ ରାତି ପ୍ରାୟ ତିନିଟାରେ ପୋଡାଗନ୍ଧ ଆସିବାରୁ ସେମାନେ ନିଆଁ ଲାଗିଥିବା ଜାଣିବାକୁ ପାଇଥିଲେ । ସଙ୍ଗେ ସଙ୍ଗେ ଅଗ୍ନିଶମ ବିଭାଗକୁ ଖବର ଦେଇଥିଲେ । ଅଗ୍ନିଶମ କର୍ମଚାରୀ ଘଟଣାସ୍ଥଳରେ ପହଁଞ୍ଚିବା ବେଳକୁ ସବୁ ଦୋକନରେ ନିଆଁ ଲାଗିଯାଇଥିଲା । ଅଗ୍ନିଶମ କର୍ମଚାରୀ ନିଆଁକୁ ନିୟନ୍ତ୍ରଣ ଲାଗି ଚେଷ୍ଠା ଜାରି ରଖିଛନ୍ତି । ମାର୍କେଟ କମ୍ପେ୍ଲକ୍ସ ପଛପଟେ ପେଟ୍ରୋଲ ପମ୍ପଥିବାରୁ ସମସ୍ତେ ଚିନ୍ତାରେ ରହିଛନ୍ତି । ଘଟଣାସ୍ଥଳରେ ଏସଡିପିଓ ଓ ତହସିଲଦାର ରହି ତଦାରଖ କରୁଛନ୍ତି । ସଟ ସର୍କିଟରୁ ଅଗ୍ନିକାଣ୍ଡ ଘଟିଥିବା ଅନୁମାନ କରାଯାଉଛି ।