ଜେଲ ଗଲେ ପୂର୍ବତନ ବିଧାୟକ ଏମ.ଭି ପ୍ରସାଦ

କଟକ(ବଡ଼ ଖବର ବ୍ୟୁରୋ):  ଜେଲ ଗଲେ ଆନ୍ଧ୍ରପ୍ରଦେଶର ପୂର୍ବତନ ବିଧାୟକ ଏମ.ଭି ପ୍ରସାଦ । ସ୍ୱତନ୍ତ୍ର ଚିଟଫଣ୍ଡ ମାମଲାରେ ତାଙ୍କୁ ଆଜି କୋର୍ଟରେ ହାଜର କରାଯାଇଥିଲା । ଆଉ ଏହା ପରେ ତାଙ୍କୁ ଚୈାଦ୍ୱାର ଜେଲ୍ରେ ପଠାଇ ଦିଆଯାଇଛି । ଗତକାଲି ଚିଟଫଣ୍ଡ ମାମଲାରେ ତାଙ୍କୁ ବିଶାଖାପାଟଣାରୁ କ୍ରାଇମବ୍ରାଞ୍ଚ ଗିରଫ କରିଥିଲା ।

ସୂଚନା ଅନୁଯାୟୀ ପଶ୍ଚିମ ଜୋନ୍ରେ ପୂର୍ବତନ ବିଧାୟକ ଏମଭି ପ୍ରସାଦ ୱାଲଫେୟାର ଗୃପ ଅଫ୍ କମ୍ପାନୀ ଖୋଲିଥିଲେ । ଏହି କମ୍ପାନୀର ଶାଖା ସେ ବିଭିନ୍ନ ଅଞ୍ଚଳରେ ଖୋଲିଥିଲେ । ଆନ୍ଧ୍ର,ଓଡିଶା,ଛତିଶଗଡ,ପ୍ରମୁଖ ରାଜ୍ୟରେ ଶାଖା ଖୋଲି ଲୋକଙ୍କ ଠାରୁ ଟଙ୍କା ଆଦାୟ କରୁଥିଲେ । ୧୨୦୦କୋଟିରୁ ଅଧିକ ଟଙ୍କା ଆଦାୟ କରି ଆଉ ଫେରାଇ ନଥିଲେ । ଏ ନେଇ ଠକାମିର ଶିକାର ହୋଇଥିବା ସମୀର କୁମାର ସାହୁ ଅଭିଯୋଗ କରିଥିଲେ ।

ଏହି ଅଭିଯୋଗକୁ ଭିତ୍ତି କରି ଇଓଡବ୍ଲ୍ୟୁ ମାମଲା ରୁଜ୍ଜୁ କରି ବିଶାଖାପାଟଣା ସ୍ଥିତ ଘରେ ଚଢାଉ କରିଥିଲା । ତାଙ୍କ ଘରୁ ନଗଦ ୪୫ ଲକ୍ଷ ଟଙ୍କା ଜବତ କରିଥିଲା । ଏହା ପରେ ତାଙ୍କୁ କଟକ ଅଣାଯାଇ ଚିଟଫଣ୍ଡ କୋର୍ଟରେ ହାଜର କରାଯାଇଥିଲା । କୋର୍ଟରେ ହାଜର ପରେ ଏମ.ଭି ପ୍ରସାଦଙ୍କ ପକ୍ଷରୁ ଜାମିନ ଆବେଦନ କରାଯାଇଛି । ତେବେ ସୋମବାର ଜାମିନ ଆବେଦନ ପାଇଁ ଶୁଣାଣି ହେବା ନେଇ ସୂଚନା ମିଳିଛି ।