ହୋମଗାର୍ଡଙ୍କ ଦାଦାଗିରି

ଖଇରା, (ବଡ଼ ଖବର ବ୍ୟୁରୋ): ପୋଲିସର ପଥର ମାଡ଼ରେ ଯୁବକ ଗୁରୁତର । ଏଭଳି ଏକ ଅଭାବନୀୟ ଘଟଣା ଘଟିଛି ବାଲେଶ୍ୱର ଜିଲ୍ଲା ଖଇରା ଅଞ୍ଚଳରେ । ଖଇରା ଥାନାର ହୋମଗାର୍ଡ ଜଗବନ୍ଧୁ ବାରିକଙ୍କ ଆକ୍ରମଣରେ ପୁରୁଷୋତ୍ତମପୁର ଗ୍ରାମର ଦିନବନ୍ଧୁ ବେହେରା ନାମକ ଜଣେ ଯୁବକ ଗୁରୁତର ଆହାତ ହୋଇ ଭଦ୍ରକ ମେଡିକାଲରେ ଚିକିତ୍ସିତ ହେଉଛନ୍ତି । ସୂଚନା ଅନୁଯାୟୀ ଗତକାଲି ଦିନବନ୍ଧୁ ଖଇରା ବାସୁଳୀ ମନ୍ଦିରରୁ ପ୍ରସାଦ ସାରି ଫେରୁଥିବା ସମୟରେ ଏତେ ରାତି ଯାଏଁ ବାହାରେ କାହିଁକି ବୁଲୁଛୁ ବୋଲି ପ୍ରଶ୍ନ କରିଥିଲେ ହୋମଗାର୍ଡ ଜଣକ । ଏହି ଘଟଣାକୁ ନେଇ ଉଭୟଙ୍କ ମଧ୍ୟରେ ଯୁକ୍ତିତର୍କ ହୋଇଥିଲା । ଉତ୍ୟକ୍ତ ହୋଇ ଜଗବନ୍ଧୁ ଏକ କଂକ୍ରିଟ ପଥରଖଣ୍ଡରେ ଦିନବନ୍ଧୁଙ୍କ ମୁଣ୍ଡକୁ ଆକ୍ରମଣ କରିଥିଲେ । ଏଥିରେ ତାଙ୍କ ମୁଣ୍ଡ ଫାଟିଯିବା ସହ ଆଖିପତା ଫାଟି ପ୍ରଚୁର ରକ୍ତସ୍ରାବ ହୋଇଥିଲା । ଖବର ପାଇ ପରିବାର ଲୋକେ ଦିନବନ୍ଧୁଙ୍କୁ ଚେତା ଶୁନ୍ୟ ଅବସ୍ଥାରେ ଉଦ୍ଧାର କରି ପ୍ରଥମେ ଖଇରା ମେଡିକାଲରେ ଭର୍ତ୍ତି କରିଥିଲେ । ଅବସ୍ଥା ଗୁରୁତର ଥିବାରୁ ତାଙ୍କୁ ଭଦ୍ରକ ମୁଖ୍ୟ ଚିକିତ୍ସାଳୟରେ ଭର୍ତ୍ତି କରାଯାଇଛି । ଏନେଇ ଖଇରା ଥାନାରେ ଉଭୟ ପକ୍ଷରୁ ଏତଲା ହୋଇଥିବା ସହ ତଦନ୍ତ କରି କର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି କହିଛନ୍ତି ଖଇରା ଥାନା ଅଧିକାରୀ । ତେବେ ହୋମ ଗାର୍ଡଙ୍କ ଏଭଳି ଆଚରଣକୁୁ ନାପସନ୍ଦ କରିଛନ୍ତି ଅଞ୍ଚଳବାସୀ ।