ବେଆଇନ ବାଣ ଜବତ

ସାଲେପୁର (ବଡ଼ ଖବର ବ୍ୟୁରୋ): କରୋନା ମହାମାରୀ ପାଇଁ ଜୀବନ ଜୀବିକା ହରେଇବାକୁ ବସିଲେଣି କାରିଗର। ସରକାର କେତେବେଳେ କେଉଁ ନୀତି ଅବଲମ୍ବନ କରୁଛନ୍ତି ତାହା ଜାଣିବା କଷ୍ଟକର। ସରକାରଙ୍କ ନୀତିନିୟମରେ ବଳି ପଡ଼ିଯାଉଛନ୍ତି କୌଳିକ କାରିଗର। ବାଣ ପାଇଁ ସାରା ରାଜ୍ୟରେ ପ୍ରସିଦ୍ଧ ଲାଭ କରିଥିବା କଟକ ଜିଲ୍ଲା ପଦ୍ମପୁର, ତ୍ରିଲୋଚନପୁର, ମହାଜନପୁର, ପୁରୁଷୋତ୍ତମପୁର ଆଦି ଅଞ୍ଚଳ କରୋନାର ପ୍ରଭାବରେ ଶ୍ରୀହୀନ ପାଲଟିଛି। ନିଜର ଜୀବନ ଜୀବିକା ପାଇଁ ସଂଗ୍ରାମ କରୁଥିବାବେଳେ ପୋଲିସର କଡ଼ା ଆଭିମୁଖ୍ୟ ଯୋଗୁ ଏ ମାନେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେବାକୁ ପଡ଼ୁଛି। ଆଜି ସକାଳୁ ଜଗତପୁର ପୋଲିସ ବାଣ କାରଖାନା ଓ ବାଣ ତିଆରି କରୁଥିବା ୩ ଜଣଙ୍କୁ ଗିରଫ କରିଛି।
ଆଜି ସକାଳୁ କଟକ କମିସନରେଟର ସରକଲ-୧ ଏସିପି ଓ ଜଗତପୁର ଆଇଆଇସିଙ୍କ ନେତୃତ୍ୱରେ ଏକ ଟିମ ପଦ୍ମପୁର ଓ ତ୍ରିଲୋଚନପୁର ଗାଁରେ ଚଢଉ କରି ଲକ୍ଷାଧିକ ଟଙ୍କାର ବାଣ ସହ ବାଣ ତିଆରି ସମଗ୍ରୀ ଜବତ କରିଛି। କରୋନା ପାଇଁ ରାଜ୍ୟ ସରକାର କଡ଼ା ନିୟମ କରିଛନ୍ତି । ଯେଉଁମାନେ ବାଣ ତିଆରି କରିବେ କିମ୍ବା ଫୁଟାଇବେ ତାଙ୍କ ବିରୋଧରେ କଠୋର କାର୍ଯ୍ୟାନୁଷ୍ଠାନ ଗ୍ରହଣ କରାଯିବ ବୋଲି ପୋଲିସ କହିଛି ।