ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ଇମ୍ରାନ ଖାନଙ୍କ ପଡ଼ିଛି ଶନି ଦଶା । ମୁଣ୍ଡ ମୁଣ୍ଡ ଉପରେ ବୁଲୁଛି ବିପଦ । ସଙ୍କଟରେ ଜନାବ ଖାନ । କେଉଁ ସମୟରେ ବି ହୋଇପାରନ୍ତି ଗିରଫ । ପାକିସ୍ତାନର ପୂର୍ବତମ ପ୍ରଧାନମନ୍ତ୍ରୀ ତଥା ପୂର୍ବତନ କ୍ରିକେଟ ଖେଳାଳୀ ଇମ୍ରାନ ଖାନଙ୍କ ଏବେ ପାଦେ ପାଦେରେ ବିପଦ । ତୋଷଖାନା ବିବାଦ ତାଙ୍କ ପିଛା ଛାଡ଼ୁନି । ଯେଉଁଥିପାଇଁ ଦିନକୁ ଦିନ ତାଙ୍କର ସଙ୍କଟ ବଢ଼ିବାରେ ଲାଗିଛି । କେତେବେଳେ ଇମ୍ରାନ ଭୟରେ ଲୁଚି ପଳାଉଛନ୍ତି ତ ଆଉ କେତେ ନିଜ ବାସଭବନ ସମ୍ମୁଖରେ ପୋଲିସ ପହଂଚିଯାଉଛି । କାରଣ ଇମ୍ରାନଙ୍କୁ ଗିରଫ କରିବା ପାଇଁ ପ୍ରସ୍ତୁତ ଅଛି ଇସଲାମାବାଦ ପୋଲିସ । ଏହାରି ଭିତରେ କୋର୍ଟଙ୍କ ଗିରଫ ପରୱାନା ଧରି ପହଂଚିଥିଲା ଇମ୍ରାନ ଖାନଙ୍କ ଘରେ । ହେଲେ ବାବୁ ପୋଲିସକୁ ଦେଖି ମାରିଛନ୍ତି ଚମ୍ପଟ । ଯାହା ଫଳରେ ଖାଲି ହାତରେ ଫେରିଆସିଥିଲା ପୋଲିସ ।
ତୋଷଖାନା ମାମଲାରେ ଫେବ୍ରୁଆରୀ ୨୮ ତାରିଖରେ ଇମ୍ରାନ ଖାନଙ୍କୁ କୋର୍ଟରେ ହାଜର ହେବାକୁ କୁହାଯାଇଥିଲା । ହେଲେ କୋର୍ଟଙ୍କ ଆଦେଶକୁ ଅବମାନନା କରିଥିଲେ ଇମ୍ରାନ । ଯାହା ଫଳରେ କୋର୍ଟ ପରୱାନା ଜାରି କରିଥିଲେ ଲାହେର ସେସନ୍ସ କୋର୍ଟ । ପୋଲିସ ଇମ୍ରାନଙ୍କ ଘରେ ପହଂଚିବା ପୂର୍ବରୁ ଚୋରଙ୍କ ଭଳି ଖସି ପଳାଇଥିଲେ ପାକିସ୍ତାନର ଏହି ପୂର୍ବତନ ପ୍ରଧାନମନ୍ତ୍ରୀ । ହେଲେ ଏହାରି ଭିତରେ ଖବର ପାଇଥିଲେ ତାଙ୍କ ଦଳର ସହକର୍ମୀ ନେତା ଓ ପ୍ରଶଂସକ । ଯାହା ଫଳରେ ତାଙ୍କ ଅନୁଗତମାନେ ତଥା ପିଟିଆଇର ବହୁ କର୍ମୀ ଏକାଠି ହୋଇଥିଲେ ।
ଇମ୍ରାନଙ୍କ ଘର ସମ୍ମୁଖରେ ତାଙ୍କ କର୍ମୀ ଓ ପୋଲିସ ଉପସ୍ଥିତ ଥିବା ଦେଖିବାକୁ ମିଳିଥିଲା । ସେପଟେ ଇମ୍ରାନ ଖାନଙ୍କୁ ବଂଚାଇବା ପାଇଁ ନିଜ ପାର୍ଟି ଆପ୍ରାଣ ଚେଷ୍ଟା କରିଛି । ଇସଲାମାବାଦ ପୋଲିସର ନୋଟିସ ମିଳିଛି, ଏଥିରେ କିନ୍ତୁ ଇମ୍ରାନଙ୍କୁ ଗିରଫ କରିବା ପାଇଁ ସେଭଳି କିଛି ଲେଖା ନଥିବା କହିଛନ୍ତି ଇନସାଫ୍ ଦଳର ଉପାଧ୍ୟକ୍ଷ । ଇମ୍ରାନଙ୍କ ଗିରଫଦାରୀ ପ୍ରସଙ୍ଗରେ ତାଙ୍କ ଓକିଲଙ୍କ ସହ ଆଲୋଚନା ହୋଇଛ କହିଛନ୍ତି ଦଳର ଉପାଧ୍ୟକ୍ଷ ।
