ହାଇଦ୍ରାବାଦ (ବଡ଼ ଖବର ବ୍ୟୁରୋ): ଆଇପିଏଲ ୨୦୨୩ରେ ୨୫ ତମ ମ୍ୟାଚରେ ସନରାଇଜର୍ସ ହାଇଦ୍ରାବାଦ ଓ ମୁମ୍ବାଇ ଇଣ୍ଡିଆନ୍ସ ମଧ୍ୟରେ ଖେଳାଯାଇଥିବା ମ୍ୟାଚ ରେ ମୁମ୍ବାଇ ଇଣ୍ଡିଆନ୍ସ ଠାରୁ ହାରିଲା ହାଇଦ୍ରାବାଦ । ହାଇଦ୍ରାବାଦର ରାଜୀବ ଗାନ୍ଧୀ ଅନ୍ତର୍ଜାତୀୟ ଷ୍ଟାଡିୟମରେ ଖେଳାଯାଇଥିବା ମ୍ୟାଚରେ ପ୍ରଥମେ ବ୍ୟାଟିଂ କରି ନିର୍ଦ୍ଧାରିତ ୨୦ ଓଭରରେ ୫ ୱିକେଟ ହରାଇ ୧୯୨ ରନ ସଂଗ୍ରହ କରିଥିଲା ମୁମ୍ବାଇ ।
ତେବେ ୧୯୩ ରନର ବଡ଼ ବିଜୟ ଲକ୍ଷ୍ୟ ଧରି ମୈଦାନକୁ ଓହ୍ଲାଇଥିବା ହାଇଦ୍ରାବାଦ କେବଳ ୧୭୮ ରନରେ ଅଟକି ଯାଇଛି । ଘରୋଇ ଗ୍ରାଉଣ୍ଡରେ ଟସ ଜିତି ପ୍ରଥମେ ମୁମ୍ବାଇକୁ ବ୍ୟାଟିଂ ପାଇଁ ଆମନ୍ତ୍ରଣ କରିଥିଲେ ହାଇଦ୍ରାବାଦ ଅଧିନାୟକ ଏଡେନ ମାର୍କ୍ରମ । ପ୍ରଥମରୁ ଦଳକୁ ଭଲ ଆରମ୍ଭ ଦେଇଥିଲେ ଅଧିନାୟକ ରୋହିତ ଶର୍ମା ଓ ଯୁବ ବ୍ୟାଟର ଈଶାନ କିଶାନ । ତେବେ ଦଳୀୟ ସ୍କୋର ୪୧ ହୋଇଥିବା ବେଳେ ୧୮ ବଲରୁ ୨୮ ରନ ସଂଗ୍ରହ କରିଥିବା ଅଧିନାୟକ ରୋହିତ ଶର୍ମା ଟିମ୍ ନଟରାଜନଙ୍କ ବଲରେ ଧରା ପଡ଼ିଥିଲେ । ଏହାପରେ ଈଶାନ କିଶାନ ୩୧ ବଲରୁ ୩୮ ରନ ସଂଗ୍ରହ କରିଥିଲେ ।
ଅନ୍ୟପଟେ ସୂର୍ଯ୍ୟକୁମାର କେବଳ ୭ ରନ କରି ପାଭିଲିୟନ ଫେରିଥିଲେ । ଏହାପରେ ତିଲକ ବର୍ମା ୧୭ ବଲରୁ ୪ ଛକା ଓ ୨ ଚୌକା ବଳରେ ଦୃତ ୩୭ ରନ ସଂଗ୍ରହ କରି ଆଉଟ ହୋଇଥିଲେ । ସେହିଭଳି ଟିମ ଡେଭିଡ ୧୧ ବଲରୁ ୧୬ ରନ କରି ରନ ଆଉଟ ହୋଇଥିଲେ । ତେବେ ଦଳ ପାଇଁ କାମେରନ ଗ୍ରୀନ ସର୍ବାଧିକ ୪୦ ବଲରୁ ଅପରାଜିତ ୬୪ ରନ କରିଥିଲେ । ଫଳରେ ଦଳ ନିର୍ଦ୍ଧାରିତ ଓଭରରେ ୫ ୱିକେଟ ହରାଇ ୧୯୨ ରନରେ ପହଞ୍ଚିଥିଲା ।
ଏହାପରେ ୧୯୩ ରନର ବିଶାଳ ବିଜୟ ଲକ୍ଷ୍ୟ ନେଇ ବ୍ୟାଟିଂ କରିଥିଲା ହାଇଦ୍ରାବାଦ । ଯେଉଁଥିରେ ହ୍ୟାରୀ ବ୍ରୁକ ମାତ୍ର ୯ ରନ କରି ଦ୍ୱିତୀୟ ଓଭରରେ ଆଉଟ ହୋଇ ଦଳର ଚାପ ବଢ଼ାଇଥିଲେ । ଏହାପରେ ରାହୁଲ ତ୍ରିପାଠୀ ମଧ୍ୟ ୭ ରନ କରି ତୁରନ୍ତ ପାଭିଲିୟନ ଫେରିଥିଲେ । ଏହାପରେ ଅଧିନାୟକ ମାର୍କ୍ରମ ଓ ମୟଙ୍କ ଅଗ୍ରୱାଲଙ୍କ ମଧ୍ୟରେ ଏକ ଭଲ ଭାଗିଦାରୀ ଦେଖିବାକୁ ମିଳିଥିଲା । କିନ୍ତୁ ମାର୍କ୍ରମ ୧୭ ବଲରୁ ୨୨ ରନ କରି ଆଉଟ ହୋଇଯାଇଥିଲେ । ଅଭିଷେକ ଶର୍ମା ମଧ୍ୟ ତୁରନ୍ତ ଆଉଟ ହୋଇଥିଲେ ।
ଏହାପରେ ହେନରିଚ କ୍ଲାସିନଙ୍କ ଧୂଆଁଧାର ବ୍ୟାଟିଂ ଦେଖିବାକୁ ମିଳିଥିଲା । ସେ ୧୬ ବଲରୁ ୨ ଛକା ଓ ୪ ଚୌକା ବଳରେ ୩୬ ରନ କରି ପୀୟୁଷ ଚାୱଲାଙ୍କ ଶିକାର ପାଲଟିଥିଲେ । ଅନ୍ୟପଟେ ପାଳି ସମ୍ଭାଳୁଥିବା ମୟଙ୍କ ଅଗ୍ରୱାଲ ୪୧ ବଲରୁ ୪୮ ରନ କରି ପାଭିଲିୟନ ଫେରିଥିଲେ । ଅନ୍ୟମାନଙ୍କ ମଧ୍ୟରେ ମାର୍କୋ ଜାନସେନ ୧୩ ଓ ୱାଶିଂଟନ ସୁନ୍ଦର ୧୦ ରନ କରି ଆଉଟ ହୋଇଥିଲେ । ଅନ୍ୟ କୌଣସି ବ୍ୟାଟର ଆଜି ୨ ଅଙ୍କ ବିଶିଷ୍ଟ ସ୍କୋର କରିପାରିନଥିଲେ । ଫଳରେ ଦଳ ୧୯.୫ ଓଭରରେ ସମସ୍ତ ୱିକେଟ ହରାଇ ୧୭୮ ହିଁ କରିପାରିଥିଲା ।
