ଗଡ଼ିବ ସିଂହଧ୍ୱଜ ରଥ

ଯାଜପୁର, (ବଡ଼ ଖବର ବ୍ୟୁରୋ): ଗଡ଼ିବ ମା’ ବିରଜାଙ୍କ ସିଂହଧ୍ୱଜ ରଥ। କୋଭିଡ୍ କଟକଣାରେ ରଥ ଚାଲିବା ନେଇ ଆରମ୍ଭ ହୋଇଛି ପ୍ରକ୍ରିୟା। ଆଜି ସନ୍ଧ୍ୟାରେ ଯାଜପୁର ଜିଲ୍ଲାପାଳଙ୍କ ସମ୍ମିଳନୀ କକ୍ଷରେ ଜିଲ୍ଲପାଳ, ଏସପି, ମନ୍ଦିର ପ୍ରଶାସକ ତଥା ଉପଜିଲ୍ଲାପାଳଙ୍କ ସହ ମନ୍ଦିର ସେବାୟତଙ୍କ ବୈଠକ ଅନୁଷ୍ଠିତ ହୋଇଛି। ହାଇକୋର୍ଟଙ୍କ ନିର୍ଦ୍ଦେଶ କ୍ରମେ କୋଭିଡ୍ କଟକଣା ମଧ୍ୟରେ ମା’ଙ୍କ ଶାରଦୀୟ ଦୁର୍ଗାପୂଜା ରୀତିନୀତି ଓ ନବଦିନ ବ୍ୟାପୀ ରଥଯାତ୍ରା କରାଯିବାକୁ ବୈଠକରେ ନିଷ୍ପତ୍ତି ନିଆଯାଇଛି। ଜିଲ୍ଲାପାଳ ଓ ଏସପି ମନ୍ଦିର ଭିତରକୁ ଯାଇ ରଥଯାତ୍ରାର ଭିତ୍ତିଭୂମି ତଦାରଖ କରିଛନ୍ତି।

ଆସନ୍ତା ୧୭ ତାରିଖରୁ ୨୪ ତାରିଖ ପର୍ଯ୍ୟନ୍ତ ଏହି ଉତ୍ସବରେସେବାୟତମାନଙ୍କର ୩ ପର୍ଯ୍ୟାୟରେ ହେବ କୋଭିଡ୍ ଟେଷ୍ଟ। ଏଥିସହ ରଥଯାତ୍ରା ସମୟରେ ମନ୍ଦିର ଚତୁର୍ପାର୍ଶ୍ୱରେ ୧୪୪ ଧାରା ଲାଗୁ ହେବ। କେବଳ ପୋଲିସ ଓ ସେବାୟତଙ୍କ ଦ୍ୱାରା ମା’ଙ୍କ ରଥ ଟଣାଯିବ ବୋଲି ଜିଲ୍ଲାପାଳ କହିଛନ୍ତି। ନବଦିନ ବ୍ୟାପୀ ଏହି ରଥଯାତ୍ରା ପ୍ରତ୍ୟେକ ଦିନ ଅପରାହ୍ନ ସାଢ଼େ ୩ଟାରୁ ସନ୍ଧ୍ୟା ସାଢ଼େ ୬ଟା ଯାଏ ଚାଲିବାକୁ ନିଷ୍ପତ୍ତି ହୋଇଥିବାରୁ ଟ୍ରାଫିକ୍ ବ୍ୟବସ୍ଥା ଶାନ୍ତିଶୃଙ୍ଖଳା ଓ ରଥଟଣାରେ ସହଯୋଗ  ଲାଗି ବ୍ୟାପକ ପୋଲିସ ମୁତୟନ କରାଯିବ ବୋଲି ଏସପି ସୂଚନା ଦେଇଛନ୍ତି।