ଗୋ ଚାଲାଣ ସନ୍ଦେହରେ ଅପହରଣ କରି ହତ୍ୟା
ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଗୋ ଚାଲାଣ ସନ୍ଦେହରେ ଗାଡ଼ି ସହ ଦୁଇ ଯୁବକଙ୍କୁ ଜାଳି ଦେଲେ । ରାଜସ୍ଥାନର ଭରତପୁରରେ ଦେଖିବାକୁ ମିଳିଛି ଏଭଳି ଅଭାବନୀୟ ଘଟଣା । ଏହି ମାମଲାରେ ପୁଲିସ ମୁଖ୍ୟ ଅଭିଯୁକ୍ତ ରିଙ୍କୁ ସୋନିକୁ ଗିରଫ କରି ରିମାଣ୍ଡରେ ନେଇଛି। ରାଜସ୍ଥାନ ଭରତପୁରର ଏକ ଅଦାଲତ ଅଭିଯୁକ୍ତ ରିଙ୍କୁ ସୋନିକୁ ୫ ଦିନିଆ ପୁଲିସ ରିମାଣ୍ଡରେ ପଠାଇଛନ୍ତି। ଏହାରି ଭିତରେ ରାଜସ୍ଥାନର ଶିକ୍ଷା ମନ୍ତ୍ରୀ ଜାହିଦା ଖାନ୍ଙ୍କ ନେତୃତ୍ୱରେ ଏକ ପ୍ରତିନିଧିମଣ୍ଡଳ ମୁଖ୍ୟମନ୍ତ୍ରୀ ଅଶୋକ ଗେହଲଟଙ୍କୁ ଭେଟି ଏହି ମାମଲାରେ ଆଲୋଚନା କରିଛି। ସୂଚନା ଅନୁସାରେ ବୁଧବାର ଦିନ ରାଜସ୍ଥାନର ଭରତପୁର ଜିଲ୍ଲାର ଘାଟମିକା ଗାଁରେ ରହୁଥିବା ଦୁଇ ମୁସଲିମ ଯୁବକ ନାସିର ଓ ଜୁନୈଦଙ୍କ ମୃତଦେହ ଭିୱାନୀ ଅଞ୍ଚଳର ଲୋହାରୁରେ ଏକ ଜଳନ୍ତା ବୋଲେରୋ ଗାଡି ଭିତରୁ ମିଳିଥିଲା। ଏହି ଦୁଇ ଜଣକଙ୍କୁ କିଛି ଗୋରକ୍ଷକ ବୁଧବାର ଦିନ ଅପହରଣ କରିନେଇଥିବା ଅଭିଯୋଗ ହୋଇଥିଲା।