ରାଜନୈତିକ ଶତ୍ରୁତାରୁ ହତ୍ୟା
କୋଲକାତା (ବଡ଼ ଖବର ବ୍ୟୁରୋ): ପଶ୍ଚିମବଙ୍ଗ ଦକ୍ଷିଣ ୨୪ ପ୍ରଗଣା ଜିଲ୍ଲାରେ ତୃଣମୂଳ କଂଗ୍ରେସର ଜଣେ କର୍ମୀଙ୍କୁ ଗୁଳି ମାରି ହତ୍ୟା । ମୃତ କର୍ମୀଜଣକ ହେଉଛନ୍ତି ଜିଆରୁଲ୍ ମୋଲ୍ଲା। ସୂଚନା ଅନୁସାରେ କେହି ଜଣେ ଦୁର୍ବୃତ୍ତ ଜିଆରୁଲଙ୍କୁ ଗୁଳି କରିଥିଲେ । ଗୁଳିଚୋଟରେ କ୍ଷତାକ୍ତ ହୋଇ ବାସନ୍ତୀ ଗ୍ରାମର ଗୋଟାଏ ରାସ୍ତାକଡ଼ରେ ସେ ପଡ଼ିଥିଲେ। ସେଠାରୁ ତାଙ୍କୁ ଉଠାଇ ତୁରନ୍ତ ଡାକ୍ତରଖାନା ନିଆଯାଇଥିଲା। କିନ୍ତୁ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ ।
ସେପଟେ ଜିଆରୁଲଙ୍କ ପରିବାର ଲୋକେ ଅଭିଯୋଗ କରିଛନ୍ତି ଯେ, ‘ଯୁବ ତୃଣମୂଳ କଂଗ୍ରେସ’ର ସଦସ୍ୟ ଥିବାରୁ ତାଙ୍କୁ ବାରମ୍ବାର ହତ୍ୟା ଧମକ ଦିଆଯାଉଥିଲା। ରାଜନୈତିକ ଶତ୍ରୁତା ଯୋଗୁଁ ତାଙ୍କୁ ହତ୍ୟା କରାଯାଇଛି। ଜିଆରୁଲ୍ ମୋଲ୍ଲାଙ୍କ ପୁଅ କହିଛନ୍ତି, ମୋ ବାପାଙ୍କର ଅନେକ ଶତ୍ରୁ ଥିଲେ। ତାଙ୍କର ରାଜନୈତିକ ଶତ୍ରୁତା ଥିଲା। ବିଭିନ୍ନ ନମ୍ବରରୁ ତାଙ୍କ ଫୋନ୍କୁ ହତ୍ୟା ଧମକ ଆସୁଥିଲା। ଘଟଣାସ୍ଥଳରେ ପୋଲିସ ପହଞ୍ଚି ମାମଲା ରୁଜୁ କରି ତଦନ୍ତ ଆରମ୍ଭ କରିଛି।