ସହାୟତା ଅପେକ୍ଷାରେ କୁନିରାଣୀ

ସାହାରପଡ଼ା (ବଡ଼ ଖବର ବ୍ୟୁରୋ): ସରକାର ଗରିବ ଲୋକଙ୍କୁ ଆବାସ ଗୃହ ଯୋଗାଇ ଦେଉଛନ୍ତି । ହେଲେ ବିଭାଗୀୟ ଅଧିକାରୀ ଏବଂ ପଞ୍ଚାୟତ ପ୍ରତିନିଧିଙ୍କ ଅବହେଳା ଯୋଗୁ ଯୋଗ୍ୟ ହିତାଧିକାରୀ ସରକାରୀ ଯୋଜନାରୁ ବଞ୍ଚିତ ହେଉଛନ୍ତି । ଯାହାର ଜ୍ୱଳନ୍ତ ଉଦାହରଣ ଦେଖିବାକୁ ମିଳିଛି କେନ୍ଦୁଝର ଜିଲ୍ଲା ସାହାରପଡ଼ା ବ୍ଲକ ରାଇଡିହା ପଞ୍ଚାୟତ ଭାଲୁଘର ସାହିର କୁନିରାଣୀ ନାଏକଙ୍କ କ୍ଷେତ୍ରରେ । ପାଞ୍ଚ ବର୍ଷ ପୂର୍ବେ କୁନିରାଣୀ ତାଙ୍କ ସ୍ୱାମୀଙ୍କୁ ହରାଇଛନ୍ତି । କିନ୍ତୁ ତାଙ୍କୁ ଏ ପର୍ଯ୍ୟନ୍ତ ନା ମିଳିଛି ଭତ୍ତା ନା ପ୍ରଧାନମନ୍ତ୍ରୀ ଆବାସ । କୁନିରାଣୀଙ୍କ ପରିବାର କହିଲେ ଗୋଟିଏ ଝିଅ । ସେମାନେ ଏକ ମାଟି ଘରେ ରହୁଥିଲେ । ଲଗାଣ ବର୍ଷାରେ ଘର ଭାଙ୍ଗିଯିବାରୁ କୁନିରାଣୀ ଏବଂ ତାଙ୍କ ଝିଅ ପର ଘରେ ଆଶ୍ରୟ ନେଇଛନ୍ତି । କୁନିରାଣୀ ଏ ବିଷୟରେ ବହୁବାର ସରପଞ୍ଚ ଏବଂ ବିଡିିଓଙ୍କୁ ଗୁହାରି କରିଛନ୍ତି । ହେଲେ ତାଙ୍କ କଥା କେହି ଶୁଣୁନାହାନ୍ତି ବୋଲି ମୋହଭରା କଣ୍ଠରେ କହିଛନ୍ତି । ସରକାରୀ ଯୋଜନା କାହା ପାଇଁ ବୋଲି ସେ ପ୍ରଶ୍ନ କରିଛନ୍ତି? କୁନିରାଣୀଙ୍କୁ କେବେ ସରକାରୀ ସହାୟତା ମିଳୁଛି ତାହା ଦେଖିବାକୁ ବାକି ରହିଲା ।