ରଣପୁର (ବଡ଼ ଖବର ବ୍ୟୁରୋ): ନୟାଗଡ଼ ଜିଲ୍ଲା ରଣପୁର ବ୍ଲକ ରାଇପଡ଼ା ପଞ୍ଚାୟତ ଅର୍ଜୁନପୁରରେ କୋଭିଡ ନିୟମ ମାନି ଭାରତୀୟ ଜନତା ପାର୍ଟି ଓ ପଞ୍ଚାୟତବାସୀଙ୍କ ପକ୍ଷରୁ ଏକ ସଭା ଆୟୋଜନ କରାଯାଇଥିଲା। ପଞ୍ଚାୟତରେ ହେଉଥିବା ରାସନ କାର୍ଡ ଅନିୟମିତତା, ପ୍ରଧାନମନ୍ତ୍ରୀ ଆବାସ ଯୋଜନା, ମନରେଗା କାର୍ୟ୍ୟରେ ଦୁର୍ନୀତି, ପାନୀୟଜଳ ଯୋଗାଣରେ ଅନିୟମିତତା, ସୋଲାର ଲାଇଟ୍ ଲଗାଇବାରେ ଫେଲ ମାରିବା ଭଳି ବିଭିନ୍ନ ପ୍ରସଙ୍ଗରେ ଆଲୋଚନା କରାଯାଇଥିଲା ।
ରାଇପଡ଼ା ସରପଞ୍ଚ ମାସ ମାସ ଧରି ଅନୁପସ୍ଥିତ ଥିବା ଅଭିଯୋଗ ହେଉଛି । ସରପଞ୍ଚଙ୍କ ଅନୁପସ୍ଥିତି କାରଣରୁ ପଞ୍ଚାୟତରେ ଉନ୍ନୟନ କାର୍ଯ୍ୟ ଠପ ହୋଇଯାଇଛି । ମାସିକ ବୈଠକ ହେଉ ନ ଥିବାରୁ ଲୋକଙ୍କ ଭିତରେ ତୀବ୍ର ଅସନ୍ତୋଷ ପ୍ରକାଶ ପାଇଛି। ପଞ୍ଚାୟତବାସୀ ଏନେଇ ବିଡିଓଙ୍କୁ ଦାବିପତ୍ର ଦେଇଛନ୍ତି । ସାତଦିନ ମଧ୍ୟରେ ସେମାନଙ୍କ ଦାବି ପୂରଣ ନ ହେଲେ ପଞ୍ଚାୟତବାସୀ ଆନ୍ଦୋଳନକୁ ଓହ୍ଲାଇବେ ବୋଲି ଚେତାବନୀ ଦେଇଛନ୍ତି । ବୈଠକରେ ଭାରତୀୟ ଜନତା ପାର୍ଟି ନୟାଗଡ଼ ଜିଲ୍ଲା ଉପସଭାପତି ପରେଶ ମିଶ୍ର, ଜ଼ିଲ୍ଲା ଯୁବମୋର୍ଚ୍ଚା ସାଧାରଣ ସମ୍ପାଦକ ତାପସ ରଞ୍ଜନ ମାର୍ଥା, ଚାନ୍ଦପୁର ମଣ୍ଡଳ ସଭାପତି ଜିତେନ୍ଦ୍ର ସାହୁ, ସତ୍ୟବାନ ପରିଡ଼ା, ଜଗବନ୍ଧୁ ଜେନା, ସ୍ଥାନୀୟ ଲୋକଙ୍କ ସମେତ ପଞ୍ଚାୟତର ବହୁ କର୍ମୀ ଯୋଗ ଦେଇଥିଲେ।
