ଲଖିମପୁର ଖେରି ହିଂସାକାଣ୍ଡ; ୬ ଘଣ୍ଟିଆ ରେଳ ରୋକ କଲେ ଚାଷୀ

ନୂଆଦିଲ୍ଲୀ(ବଡ଼ ଖବର ବ୍ୟୁରୋ):   ଉତ୍ତର ପ୍ରଦେଶର ଲଖିମିପୁର ଖେରିରେ ଘଟିଥିବା ହିଂସାକାଣ୍ଡ ଘଟଣାରେ ନ୍ୟାୟ ପାଇଁ ଆଜି ଦିନ ୧୦ଟାରୁ ଅପରାହ୍ନ ୪ଟା ଯାଏ ଚାଷୀମାନେ ରେଳ ରୋକ କିରଛନ୍ତି । ଏହି ହିଂସାକାଣ୍ଡରେ କେନ୍ଦ୍ରମନ୍ତ୍ରୀ ଅଜୟ ମିଶ୍ର ଟେନିଙ୍କ ଇସ୍ତଫା ଦାବିରେ ଆଜି ଚାଷୀମାନେ ୬ ଘଣ୍ଟିଆ ରେଳ ରୋକ କରିବା ପାଇଁ ନିଷ୍ପତି ନେଇଛନ୍ତି । ବହୁଦିନ ଧରି କୃଷି ଆଇନକୁ ବିରୋଧ କରି ଦୀର୍ଘ ୧୧ ମାସ ହେଲା ଆନ୍ଦୋଳନ କରୁଥିବା ଚାଷୀମାନଙ୍କ ପକ୍ଷରୁ ଏପରି ରେଳ ରୋକ ଡାକରା ଦେଇଛନ୍ତି ।

ତେବେ ଲଖିମପୁର ଖେରିରେ କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ପୁଅ ଚାଷୀଙ୍କ ଉପରେ ଗାଡି ଚଢାଇ ଦେଇଥିବା ଅଭିଯୋଗ ହୋଇଥିଲା । ଏଥିରେ ୪ ଜଣ ଚାଷୀଙ୍କ ସମେତ ୫ ଜଣଙ୍କ ମୃତ୍ୟୁ ହୋଇଥିଲା । ପରେ ପୋଲିସ ଏହି ଘଟଣାରେ କେନ୍ଦ୍ରମନ୍ତ୍ରୀଙ୍କ ପୁଅ ଆଶିଷ ମିଶ୍ରାଙ୍କୁ ଗିରଫ କରିଛି । କିନ୍ତୁ ଚାଷୀମାନେ ଆଶିଷଙ୍କ ଗିରଫ ସହ କେନ୍ଦ୍ରମନ୍ତ୍ରୀ ଅଜୟ ମିଶ୍ରାଙ୍କ ଇସ୍ତଫା ମଧ୍ୟ ଦାବି କରିଛନ୍ତି ।

ସେ କେନ୍ଦ୍ରଗୃହ ରାଷ୍ଟ୍ରମନ୍ତ୍ରୀ ପଦରେ ଥିବା ଯାଏ ଏହି ଘଟଣାର ନିରପେକ୍ଷ ତଦନ୍ତ ହୋଇପାରିବ ନାହିଁ ବୋଲି ମୋର୍ଚ୍ଚା ପକ୍ଷରୁ କୁହାଯାଇଛି । ତେଣୁ ଆଜି ଚାଷୀମାନଙ୍କ ପକ୍ଷରୁ ୬ ଘଣ୍ଟା ପାଇଁ ରେଳ ରୋକ କରାଯାଇଛି । ଶାନ୍ତିପୂର୍ଣ୍ଣ ଭାବେ ରେଳ ରୋକ କରାଯିବ ବୋଲି ଚାଷୀମାନେ କହିଛନ୍ତି ।