ହୋଲି ଖେଳ ହେଲା କାଳ, ଗାଧୋଇବା ବେଳେ ବୁଡିଗଲେ ଯୁବକ
ମାହାଙ୍ଗା (ବଡ଼ ଖବର ବ୍ୟୁରୋ): ହୋଲି ଖେଳ ହେଲା କାଳ । ନଦୀରେ ଗରଧୋଉଥିବାବେଳେ ଚାଲିଗଲା ଜୀବନ । କଟକ ଜିଲ୍ଲା ନିଶ୍ଚିନ୍ତକୋଇଲି ଥାନା ଅଂଚଳରେ ଦେଖିବାକୁ ମିଳିଛି ଅଭାବନୀୟ ଘଟଣା । ଖଣ୍ଡସହି ନିକଟରେ ହୋଲି ଖେଳୁଥିବା ସରପଡା ପଂଚାୟତ ବୋଧଙ୍ଗ ଗ୍ରାମର ୪ ଜଣ ଯୁବକ ମଧ୍ୟାନରେ ଗାଧେଇବା ପାଇଁ ନିକଟସ୍ଥ ଲୁଣାନଦୀକୁ ଯାଇଥିଲେ । ସେଠାରେ ଗାଧୋଇବା ବେଳେ ସୌମ୍ୟରଞ୍ଜନ ସ୍ୱାଇଁ ନାମକ ଜଣେ ଯୁବକ ପହଁରା ଜାଣିନଥିବାରୁ ନଦୀ ଭିତରୁ କୂଳକୁ ଆସିପାରି ନଥିଲେ । ଅନ୍ୟ ସାଙ୍ଗମାନେ ମଧ୍ୟ ସୌମ୍ୟଙ୍କୁ ଉଦ୍ଧାର କରିପାରିନଥିଲେ ।
ନଦୀରେ ପାଣି ଅଧିକ ଥିବାରୁ ସୌମ୍ୟ ଗଭୀର ଜଳରେ ସାଙ୍ଗମାନଙ୍କ ଆଖି ଆଗରେ ବୁଡ଼ିଯାଇଥିଲେ । ସ୍ଥାନୀୟ ଲୋକମାନେ ବହୁ ସମୟ ଖୋଜାଖୋଜି କରିବା ପରେ ନିଖୋଜ ଯୁବକଙ୍କୁ ପାଣି ଭିତରୁ ଉଦ୍ଧାର କରିଥିଲେ । ତେବେ ବହୁ ବିଳମ୍ବ ହୋଇଯାଇଥିବାରୁ ସେତେବେଳକୁ ଯୁବକର ମୃତ୍ୟୁ ଘଟିସାରିଥିଲା ବୋଲି ସୂଚନା ମିଳିଥିଲା । ଏହି ଘଟଣାକୁ ନେଇ ସ୍ଥାନୀୟ ଅଞ୍ଚଳରେ ଶୋକାକୂଳ ପରିବେଶ ସୃଷ୍ଟି ହୋଇଛି । ତେବେ ନଦୀରୁ ଉଦ୍ଧାର ପରେ ସୌମ୍ୟଙ୍କୁ ସ୍ଥାନୀୟ ହସ୍ପିଟାଲରେ ଭର୍ତ୍ତି କରାଯାଇଥିଲେ ମଧ୍ୟ ସେଠାରେ ଡାକ୍ତର ତା’ଙ୍କୁ ମୃତ ଘୋଷଣା କରିଥିଲେ ।