ରାହୁଲଙ୍କ ସଦସ୍ୟପଦ ଫେରାଇବାରେ ବିଳମ୍ବକୁ ନେଇ ପ୍ରଶ୍ନ ଉଠାଇଲେ ସଞ୍ଜୟ ରାଉତ

ନୂଆଦିଲ୍ଲୀ (ବଡ଼ ଖବର ବ୍ୟୁରୋ):   ମୋଦି ସରନେମ ମାମଲାରେ ସୁପ୍ରିମକୋର୍ଟ କଂଗ୍ରେସ ନେତା ରାହୁଲ ଗାନ୍ଧୀଙ୍କ ଦଣ୍ଡକୁ ସ୍ଥଗିତ ରଖିଛନ୍ତି। କୋର୍ଟଙ୍କ ନିଷ୍ପତ୍ତି ପରେ ସମଗ୍ର ବିରୋଧୀଙ୍କ ମଧ୍ୟରେ ଖୁସିର ବାତାବରଣ ସୃଷ୍ଟି ହୋଇଛି। ବର୍ତ୍ତମାନ ତାଙ୍କର ସଂସଦର ସଦସ୍ୟତା ନେଇ ରାଜନୀତି ଆରମ୍ଭ ହୋଇଛି। ଶିବସେନା (ୟୁବିଟି) ର ରାଜ୍ୟସଭା ସାଂସଦ ସଞ୍ଜୟ ରାଉତ ଲୋକସଭା ବାଚସ୍ପତି ଓମ ବିର୍ଲାଙ୍କ ଉପହାସ କରିଛନ୍ତି । ସେ କହିଛନ୍ତି, “ରାହୁଲ ଗାନ୍ଧୀଙ୍କୁ ସରକାର ଭୟ କରୁଛନ୍ତି ଏବଂ ଡରୁଛନ୍ତି ମଧ୍ୟ ।

ସୁରଟ କୋର୍ଟର ନିଷ୍ପତ୍ତି ପରେ ତୁରନ୍ତ ବାଚସ୍ପତି ତାଙ୍କର ସଦସ୍ୟତା ପଦା ରଦ୍ଦ କରିଥିଲେ । ଏମିତିକି ତାଙ୍କ ଠାରୁ ସରକାରୀ ବସଭବନ ମଧ୍ୟ ଛଡ଼ାଇ ନେଇଥିଲେ । ସୁପ୍ରିମକୋର୍ଟ ଏବେ ନିଷ୍ପତ୍ତି ସ୍ଥଗିତ ରଖିଛନ୍ତି। ଆଜି ସେହି ନିଷ୍ପତ୍ତି ହେବାର ତିନି ଦିନ ହେଲାଣି କିନ୍ତୁ ବାଚସ୍ପତି କହୁଛନ୍ତି ଯେ ତାଙ୍କୁ ଅଧ୍ୟୟନ କରିବାକୁ ପଡ଼ିବ । ପୂର୍ବରୁ କ’ଣ ଆପଣ ଅଧ୍ୟୟନ କରିଥିଲେ କି? ଆଜି କ’ଣ କରୁଛନ୍ତି? ଆପଣ କ’ଣ ଏହି ବିଷୟରେ ପିଏଚଡି କରିବେ କି?