ସମଲେଇ ପୀଠରେ ନବରାତ୍ରୀ

ସମ୍ବଲପୁର (ବଡ଼ ଖବର ବ୍ୟୁରୋ): ସମ୍ବଲପୁର ଅଧିଷ୍ଠାତ୍ରୀ ଦେବୀ ମା’ ସମଲେଇଙ୍କ ପୀଠରେ ନବରାତ୍ରରୁ ଆରମ୍ଭ ହୋଇଛି ଷୋଡ଼ଷ ଉପଚାର ପୂଜା । ମା’ଙ୍କ ନିକଟରେ ଦୀପ ଜାଳିଲେ ମନସ୍କାମନା ପୂରଣ ହେଉଥିବା କାହିଁ କେଉଁ ଆବାହମାନ କାଳରୁ ଲୋକଙ୍କ ମନରେ ବିଶ୍ୱାସ  ରହିଆସିଛି । ଗତକାଲି ମା’ଙ୍କ ମନ୍ଦିରରେ ଦୀପଦାନ କରିବା ଲାଗି ଲାଗିଥିଲା ଭକ୍ତଙ୍କ ଭିଡ଼ । ଆଗାମୀ ବିଜୟା ଦଶମୀ ଯାଏଁ ଏଭଳି ଭକ୍ତଙ୍କ ସମାଗମ ହେବ । କରୋନା କଟକଣାକୁ ଦୃଷ୍ଟିରେ ରଖି ଭକ୍ତଙ୍କୁ ନିୟନ୍ତ୍ରଣ କରାଯାଉଛି ।

ଶାରଦୀୟ ନବରାତ୍ର ପୂଜା ଅବସରରେ ସକାଳ ଚାରିଟାରେ ପହଡ଼ ଖୋଲି ପୂଜା ଆରମ୍ଭ ହୋଇ ୫ଟାରେ ସରିଥିଲା । ସକାଳ ୬ଟାରୁ ଭକ୍ତଙ୍କ ଦ୍ୱାରା ମାନସିକ ଦୀପ ପ୍ରଜଳନ ହୋଇଥିଲା । ପୂଜକମାନେ ଭକ୍ତଙ୍କ ନାମ ଓ ଗୋତ୍ରକୁ ପାଠ କରିବା ପରେ ଦୀପ ଜଳାଯାଇଥିଲା । କରୋନା କଟକଣାକୁ ଦୃଷ୍ଟିରେ ରଖି ଶ୍ରୀ ଶ୍ରୀ ସମଲେଶ୍ୱରୀ ମନ୍ଦିର ଟ୍ରଷ୍ଟ ବୋର୍ଡ଼ର ଫେସବୁକ ପେଜରେ ଗତ ଅଗଷ୍ଟ ମାସରୁ ମା’ଙ୍କ ସନ୍ଧ୍ୟା ଆଳତୀ ଲାଇଭ ପ୍ରଦର୍ଶିତ ହେଉଛି । ଭକ୍ତମାନେ ସକାଳେ ଓ ସନ୍ଧ୍ୟାରେ ଭର୍ଚୁଆଲ ଦର୍ଶନ କରୁଛନ୍ତି ।