ଜାହାଜରୁ ୨୨କେଜି କୋକେନ ଜବତ, ପାରାଦୀପରେ ତିନି ଜଣିଆ ଏନସିବି ଟିମ

ପାରାଦୀପ (ବଡ଼ ଖବର ବ୍ୟୁରୋ):ଜାହାଜରୁ ୨୨୦ କୋଟିର କୋକେନ ଧରାପଡିବା ପରେ ପ୍ରଶାସନ ତତ୍ପର ହୋଇଛି । ବର୍ତ୍ତମାନ ତଦନ୍ତ ଭାର ଏନସିବିକୁ ହସ୍ତାନ୍ତର କରାଯାଇଛି । ପିଆଇସିଟି ବର୍ଥରେ ପହଞ୍ଚିଛନ୍ତି ଏନସିବିର ତିନିଜଣିଆ ଟିମ। ଟିମରେ ଅଛନ୍ତି ଏନସିବି ଆସିଷ୍ଟାଣ୍ଟ ଡାଇରେକ୍ଟର କୁଲଦୀପ ଶର୍ମା । ଏମଭି ଦେବୀ ଜାହାଜର କର୍ମଚାରୀଙ୍କୁ ପଚରା ଉଚରା କରୁଛି ଏନସିବି ଟିମ । ଗୁରୁବାର ବିଳମ୍ବିତ ରାତିରେ ପାରାଦ୍ବୀପ ବନ୍ଦରର ପିଆଇସିଟି ବର୍ଥରେ ଲାଗିଥିବା ଏମଭି ଦେବୀ ଜାହାଜରୁ ୨୨ କେଜିର କୋକେନ ଜବତ ହୋଇଥିଲା।

ଏହି ଜାହାଜଟି ସ୍ପେନରୁ ଇଣ୍ଡୋନେସିଆ ଦେଇ ପାରାଦ୍ଵୀପ ଆସିଥିଲା ଏବଂ ପାରାଦ୍ଵୀପରୁ ଷ୍ଟିଲ ପ୍ଲେଟ ନେଇ ଡେନମାର୍କ ଯାଇଥାନ୍ତା । ଜାହାଜର ଜଣେ କର୍ମଚାରୀ ସେଠାରେ କାର୍ଯ୍ୟ କରୁଥିବା ସିକ୍ୟୁରିଟି ଗାର୍ଡ ଜରିଆରେ ପୋଲିସକୁ ଖବର ଦେଇଥିଲେ । ଖବରପାଇ ପୋଲିସ ଚଢ଼ାଉ କରିବା ପରେ ସିଆଇଏସଏଫ ଓ ଡ୍ରଗ ସ୍କ୍ୱାର୍ଡ ବିଭାଗକୁ ଖବର ଦିଆଯାଇଥିଲା । ପରେ ସିଆଇଏସଏଫ ଓ ଡ୍ରଗ ସ୍କ୍ୱାର୍ଡ ଘଟଣାସ୍ଥଳରେ ପହଞ୍ଚି ଘଟଣାର ଯାଞ୍ଚ କରିବା ସହିତ ସନ୍ଧାନୀ କୁକୁର ସହାୟତାରେ ଛାନଭିନ କରିଥିଲେ ।