ନିଟ୍ ୟୁଜି ପୁନଃ ପରୀକ୍ଷା, ଟେଲିଗ୍ରାମ୍ ବନ୍ଦ
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): କେନ୍ଦ୍ର ସରକାର NEET-UG ପୁନଃପରୀକ୍ଷା ସମ୍ପର୍କରେ ଏକ ବଡ଼ ନିଷ୍ପତ୍ତି ନେଇଛନ୍ତି। ଜୁନ ୨୨ ପର୍ୟ୍ୟନ୍ତ ଟେଲିଗ୍ରାମ ବ୍ୟବହାର ଉପରେ ଏକ ଅସ୍ଥାୟୀ କଟକଣା ଜାରି କରାଯାଇଛି। ଏହି ନିଷ୍ପତ୍ତିର ଲକ୍ଷ୍ୟ ହେଉଛି ପରୀକ୍ଷା ସୁରକ୍ଷିତ ଭାବରେ ପରିଚାଳନା ହେବା ଏବଂ ଠକ ସିଣ୍ଡିକେଟଗୁଡ଼ିକୁ କାର୍ଯ୍ୟ କରିବାରୁ ରୋକିବା। NEET-UGପୁନଃପରୀକ୍ଷା ଜୁନ ୨୧ ପାଇଁ ସ୍ଥିର କରାଯାଇଛି। ଏହା ସହିତ, ଟେଲିଗ୍ରାମରେ ମେସେଜ-ଏଡିଟିଂ ବୈଶିଷ୍ଟ୍ୟ ଜୁନ ୩୦ ପର୍ଯ୍ୟନ୍ତ ବନ୍ଦ ରହିବ। ଜାତୀୟ ପରୀକ୍ଷା ଏଜେନ୍ସି (NTA) କେନ୍ଦ୍ର ସରକାରଙ୍କ ଏହି ନିଷ୍ପତ୍ତିକୁ ସ୍ବାଗତ କରିଛି।
ଏହାସହିତ ପୁରୁଣା ମେସେଜ୍ ବଦଳାଇ ମିଥ୍ୟା ପ୍ରଶ୍ନପତ୍ର ଲିକର ଗୁଜବ ସୃଷ୍ଟି କରୁଥିବା ଜାଲିଆତି ଗ୍ୟାଙ୍ଗଙ୍କ ଉପରେ ରୋକ୍ ଲଗାଇବା ପାଇଁ, ଟେଲିଗ୍ରାମର ‘ମେସେଜ୍-ଏଡିଟିଂ’ ଫିଚରକୁ ମଧ୍ୟ ଜୁନ୍ ୩୦ ତାରିଖ ପର୍ୟ୍ୟନ୍ତ ଭାରତରେ ନିଷିଦ୍ଧ କରିବାକୁ ସରକାର ନିର୍ଦ୍ଦେଶ ଦେଇଛନ୍ତି। ଏହି ଅସ୍ଥାୟୀ ପ୍ରତିବନ୍ଧକ ଯୋଗୁଁ ଦେଶର କୋଟି କୋଟି ସାଧାରଣ ବ୍ୟବହାରକାରୀ ଅସୁବିଧାର ସମ୍ମୁଖୀନ ହେବାକୁ ଥିଲେ ମଧ୍ୟ, ଦେଶର ସବୁଠାରୁ ବଡ଼ ପ୍ରବେଶିକା ପରୀକ୍ଷାର ଗାରିମା ରକ୍ଷା କରିବା ପାଇଁ ଏଭଳି ପ୍ଲାଟଫର୍ମ-ସ୍ତରୀୟ କାର୍ୟ୍ୟାନୁଷ୍ଠାନ ଅତ୍ୟନ୍ତ ଜରୁରୀ ଥିଲା ବୋଲି ‘ଏନଟିଏ’ ସ୍ପଷ୍ଟ କରିଛି।
‘ଏନଟିଏ’ ସୂଚନା ଅନୁଯାୟୀ, ନିଟ୍ ପୁନଃ-ପରୀକ୍ଷାକୁ ଟାର୍ଗେଟ୍ କରି ଅନେକ ସଂଗଠିତ ନକଲି ଗ୍ରୁପ୍ ଟେଲିଗ୍ରାମ୍ ଜରିଆରେ ସକ୍ରିୟ ଥିଲେ, ଯେଉଁମାନେ ପରୀକ୍ଷାର୍ଥୀଙ୍କୁ ପ୍ରଶ୍ନପତ୍ର ଯୋଗାଇଦେବାର ମିଥ୍ୟା ପ୍ରଲୋଭନ ଦେଖାଉଥିଲେ। ପୂର୍ବରୁ କର୍ତ୍ତୃପକ୍ଷ ଅନେକ ନକଲି ଚ୍ୟାନେଲ୍, ଗ୍ରୁପ୍ ଓ ବଟଗୁଡ଼ିକୁ ହଟାଇଥିଲେ ମଧ୍ୟ ସେମାନଙ୍କ କାର୍ୟ୍ୟକଳାପ ନିୟନ୍ତ୍ରଣ ବାହାରକୁ ଚାଲିଯିବାରୁ ଏହି ବଡ଼ ପଦକ୍ଷେପ ନିଆଯାଇଛି। ବିଶେଷ କରି ପୂର୍ବରୁ ପୋଷ୍ଟ ହୋଇଥିବା ମେସେଜକୁ ଏଡିଟ୍ କରି ଓ ପୁରୁଣା ଟାଇମଷ୍ଟାମ୍ପର ଅପବ୍ୟବହାର କରି ପେପର୍ ଲିକର ମିଥ୍ୟା ପ୍ରମାଣ ତିଆରି କରାଯାଉଥିବାରୁ ଏଡିଟିଂ ଫିଚରକୁ ବନ୍ଦ କରାଯାଇଛି। ତେବେ ପରୀକ୍ଷା ଶେଷ ହେବାର ତୁରନ୍ତ ପରେ ଏହି ପ୍ରତିବନ୍ଧକ ହଟାଇ ଦିଆଯିବ।