ନୀଳଗିରି ,(ବଡ଼ ଖବର ବ୍ୟୁରୋ): ଅଙ୍ଗନୱାଡ଼ି ପିଲାଙ୍କୁ ପୋଷାକ ବିତରଣରେ ବାରି ହୋଇପଡୁଛି ଦୁର୍ନୀତିର ଗନ୍ଧ । ଅନୀୟମିତା ଓ ହେରଫେର ଘଟଣାର ପର୍ଦ୍ଦାଫାସ କରିଛନ୍ତି ନିଜେ ଅଙ୍ଗନୱାଡି କର୍ମୀ । କୁନି କୁନି ପିଲାଙ୍କୁ ନମ୍ନମାନର ପୋଷାକ ଦିଆଯାଉଛି ବୋଲି ଏବେ ଅଭିଯୋଗ ଉଠୁଛି । ବାଲେଶ୍ୱର ଜିଲ୍ଲା ନୀଳଗିରି ବ୍ଲକରୁ ଆସିଛି ଏଭଳି ଅଭିଯୋଗ । ଆଜି ନୀଳଗିରି ସିଡିପିଓ କାଞ୍ଚନ ରାମାଙ୍କୁ ଭେଟି ଅବଗତ କରାଇଛନ୍ତି ପୌରାଞ୍ଚଳର ୩୮ କେନ୍ଦ୍ରର ଅଙ୍ଗନୱାଡି କର୍ମୀ । ପିଲାଙ୍କୁ ସିଲେଇ ପୋଷାକ ପରିବର୍ତ୍ତେ ରେଡ଼ିମେଡ଼ ପୋଷାକ ଦିଆଯାଉଥିବା ଅଭିଯୋଗ କରିଛନ୍ତି କର୍ମୀ ।
ପୌରାଞ୍ଚଳର ୩୮ଟି କେନ୍ଦ୍ରର ପ୍ରାୟ ୧୨୦୦ ପିଲାଙ୍କୁ ସିଲେଇ ପୋଷାକ ଯୋଗାଇବା ପାଇଁ ବାବା ସିରିଡ଼ି ସାଇ ମହାସଂଘ ନାମକ ଏକ ସ୍ୱୟଂ ସହାୟକ ଗୋଷ୍ଠିକୁ ଦାୟିତ୍ୱ ଦିଆଯାଇଥିଲା । ତେବେ ମାତ୍ର ତିନଦିନ ମଧ୍ୟରେ ଏତେ ପୋଷାକ କେମିତି ସିଲେଇ କରାଗଲା ବୋଲି ପ୍ରଶ୍ନ କରିଛନ୍ତି ଅଙ୍ଗନୱାଡି କର୍ମୀମାନେ । ଏନେଇ ସିଡିପିଓଙ୍କୁ ପଚାରିବାରୁ ଏବାବଦରେ ସେ କିଛି କହିବେ ନାହିଁ ବୋଲି ସ୍ପଷ୍ଟ କରିଦେଇଛନ୍ତି ।
