ଭିଜିଲାନ୍ସ ଜାଲରେ ସରକାରୀ ବାବୁ

ନିମାପଡ଼ା (ବଡ଼ ଖବର ବ୍ୟୁର): ଲାଞ୍ଚ ନେବା ସମୟରେ ପୁରୀ ଜିଲ୍ଲା ନିମାପଡା ସହକାରୀ ଉଦ୍ୟାନ ବିଭାଗ ଅଧିକାରୀ ରମାକାନ୍ତ ପରିଡ଼ାଙ୍କୁ ଭୁବନେଶ୍ୱର ଭିଜିଲାନ୍ସ ବିଭାଗର କର୍ମଚାରୀମାନେ ଗିରଫ କରିଛନ୍ତି । ନିମାପଡା ବ୍ଲକ କୋଠକୁସାଙ୍ଗ ପଂଚାୟତ କାଜିପୁର ଗ୍ରାମର ଝରଣା ସାମନ୍ତରାୟଙ୍କୁ ଛତୁଚାଷ ଯୋଜନାରେ ୬୦ହଜାର ଟଙ୍କା ସବସିଡି କରାଇଦେବା ପାଇଁ ସହକାରୀ ଉଦ୍ୟାନ ବିଭାଗ ଅଧିକାରୀ ରମାକାନ୍ତ ପରିଡ଼ା ୧୦ ହଜାର ଟଙ୍କା ଦାବି କରିଥିଲେ । ଏ ସମ୍ପର୍କରେ ଝରଣା ଭିଜିଲାନ୍ସ ବିଭାଗର ଦ୍ୱାରସ୍ଥ ହୋଇଥିଲେ । ଝରଣା ଗତକାଲି ସନ୍ଧ୍ୟାରେ ଉଦ୍ୟାନ ବିଭାଗ କାର୍ୟ୍ୟାଳୟରେ ରମାକାନ୍ତ ପରିଡ଼ା ଲାଞ୍ଚ ନେଉଥିବା ବେଳେ ପୂର୍ବରୁ ପ୍ରସ୍ତୁତ ଥିବା ଭିଜିଲାନ୍ସ ବିଭାଗର ଡ଼ିଏସପି ଅକ୍ଷୟ କୁମାର ମିଶ୍ରଙ୍କ ନେତୃତ୍ୱରେ କର୍ମଚାରୀମାନେ ତାଙ୍କୁ ଗିରଫ କରିଥିଲେ । ପରେ ତାଙ୍କୁ ଭିଜିଲାନ୍ସ ବିଭାଗ କର୍ମଚାରୀମାନେ ଭୁବନେଶ୍ୱର ନେଇଛନ୍ତି । ପ୍ରକାଶ ଥାଉକି ନିମାପଡା ଉଦ୍ୟାନ ବିଭାଗ ର ଅନେକ ଯୋଜନା ସାଧାରଣ ଲୋକଙ୍କ ନିକଟରେ ପହଁଚି ପାରୁ ନାହିଁ ।