ଭୁବନେଶ୍ୱର (ବଡ଼ ଖବର ବ୍ୟୁରୋ): ଦ୍ୱିତୀୟ ଲହର ସଂକ୍ରମଣ ତଳମୁହାଁ ହୋଇଛି । ତେବେ ଦେଶରେ ୫୫ ଟି ଜିଲ୍ଲାରେ ସଂକ୍ରମଣ ହାର ୧୦ ପ୍ରତିଶତରୁ ଅଧିକ ରହିଛି । ୫୫ ସର୍ବାଧିକ ସଂକ୍ରମିତ ଜିଲ୍ଲାମାନଙ୍କ ମଧ୍ୟରୁ ଓଡ଼ିଶାରୁ ଗୋଟିଏ ଜିଲ୍ଲା ପୁରୀ ରହିଛି । ପୁରୀରେ ୧୨.୪ ଟେଷ୍ଟ ପଜିଟିଭିଟି ରେଟ ରହିଛି । ସ୍ୱାସ୍ଥ୍ୟ ମନ୍ତ୍ରାଳୟ ଯୁଗ୍ମ ସଚିବ ଲବ୍ ଅଗ୍ରୱାଲଙ୍କ ସୂଚନା ଅନୁସାରେ, ରାଜସ୍ଥାନରେ ସର୍ବାଧିକ ୯ ଜିଲ୍ଲାରେ ପଜିଟିଭ ହାର ୧୦ ପ୍ରତିଶତରୁ ଅଧିକ ରହିଛି ।

ସହିପରି କେରଳ, ମଣିପୁରରୁ ୮ ଲେଖାଁଏ, ମେଘାଳୟ ୭, ନାଗାଲାଣ୍ଡ ୫, ମିଜୋରାମର ୪, ସିକିମର ୩ ଟି ଜିଲ୍ଲାରେ ପଜିଟିଭିଟି ହାର ୧୦ ପ୍ରତିଶତ ଉପରେ । ଜୁଲାଇରେ ଦେଶର ମୋଟ ସଂକ୍ରମିତଙ୍କ ମଧ୍ୟରୁ କେରଳରେ ସର୍ବାଧିକ ୩୦.୩ ପ୍ରତିଶତ ରହିଛି । ସେହିପରି ମହାରାଷ୍ଟ୍ର ଦ୍ୱିତୀୟ ୨୦.୮, ତାମିଲନାଡୁ ୮.୫ ପ୍ରତିଶତ ସହ ତୃତୀୟରେ ରହିଛି । ଆନ୍ଧ୍ର ୭.୩ ପ୍ରତିଶତରେ ଚତୃର୍ଥ ଏବଂ ୬.୫ ପ୍ରତିଶତ ସଂକ୍ରମିତ ସହ ଓଡ଼ିଶା ପଞ୍ଚମ ସ୍ଥାନରେ ରହିଥିବା ସେ ସୂଚନା ଦେଇଛନ୍ତି । ଅନ୍ୟପକ୍ଷେ କରୋନାର ତୃତୀୟ ଲହରକୁ ନେଇ କେନ୍ଦ୍ରସରକାର ପୁଣିଥରେ ଚେତାବନୀ ଦେଇଛନ୍ତି ।

Leave a Reply

Your email address will not be published. Required fields are marked *