ବିଳମ୍ବରେ ଆସିବ ଶୀତ

ଭୁବନେଶ୍ୱର (ବଡ଼ ଖବର ବ୍ୟୁରୋ): ମୌସୁମୀ ଦଶହରାକୁ ଭିଜାଇବ, ଏମତି ଆଶଙ୍କା ରହିଥିଲା । ଚାଷୀକୁଳ ମଧ୍ୟ ଚିନ୍ତାରେ ଥିଲେ । ମୌସୁମୀ ଯୋଗୁଁ ଅମଳ ହେବାକୁଥିବା ଧାନ ଅନେକ ସ୍ଥାନରେ ଗଜା ହୋଇଛି । ବନ୍ୟା ପରେ ପରେ ପୁଣି ମୌସୁମୀ ଆସିବା, ଓଡି଼ଶା ଉପରେ ଭାଲେଣି ପଡିଥିଲା । କିନ୍ତୁ ଏବେ ଆଶଙ୍କା ପ୍ରାୟତଃ ଦୂର ହୋଇଯାଇଛି । ଓଡି଼ଶା ଛାଡିବ ମୌସୁମୀ । ଗୋଟିଏରୁ ୨ ଦିନ ଭିତରେ ରାଜ୍ୟରୁ ମୌସୁମୀ ଫେରିଯିବ । ଏନେଇ ଆଞ୍ଚଳିକ ପାଣିପାଗ ବିଜ୍ଞାନ କେନ୍ଦ୍ର ପକ୍ଷରୁ ଆଶଙ୍କା କରାଯାଇଛି ।

ପାଣିପାଗ କେନ୍ଦ୍ରର ସୂଚନା ଅନୁସାରେ, ଓଡି଼ଶା ଉପକୂଳବର୍ତ୍ତୀ ଉତ୍ତ-ପଶ୍ଚିମ ବଙ୍ଗୋପସାଗର ଉପରେ ରହିଥିବା ଅବପାତ ବର୍ତ୍ତମାନ ଉତ୍ତର-ଉତ୍ତର ପୂର୍ବ ଆଡକୁ ଗତିକରି ପଶ୍ଚିମବଙ୍ଗ ଓ ସଂଲଗ୍ନ ବାଂଲାଦେଶ ଉପକୂଳ ଅତିକ୍ରମ କରିବ । ଅବପାତ ରୂପରେ ପାଖାପାଖି ୪୫ରୁ ୫୫ କିମି ବେଗରେ ଏହା ପଶ୍ଚିମବଙ୍ଗ ଓ ସଂଲଗ୍ନ ବାଂଲାଦେଶ ଉପକୂଳ ଦେଇ ଅତିକ୍ରମ କରିଥିବା ସୂଚନା ରହିଛି । ଏହା ଆଗରୁ ଉତ୍ତ-ଉତ୍ତର ପୂର୍ବ ଦିଗରେ ଗତି କରିବା ସହ ଆସନ୍ତା ୧୨ ଘଣ୍ଟା ମଧ୍ୟରେ ଦୁର୍ବଳ ହୋଇଯିବ । ବାଂଲାଦେଶ ଉପକୂଳରେ ସ୍ପଷ୍ଟ ଚିହ୍ନିତ ଲଘୁଚାପରେ ପରିଣତ ହେବ । ଏହାର ପ୍ରଭାବ ଆଉ ଓଡିଶା ଉପରେ ରହିବ ନାହିଁ । ଫଳରେ ରାଜ୍ୟରେ ବିଶେଷ ବର୍ଷାର ସମ୍ଭାବନା ନାହିଁ । ପରିବେଶ ଅନୁକୂଳ ଥିବାରୁ ରାଜ୍ୟରୁ ଦକ୍ଷିଣ-ପଶ୍ଚିମ ମୌସୁମୀ ବାୟୁ ଫେରିଯିବା ଆରମ୍ଭ କରିିବ ।

ଆସନ୍ତାକାଲିଠୁ କେନ୍ଦୁଝର, ସୁନ୍ଦରଗଡ, ମୟୂରଭଞ୍ଜ, ସମ୍ବଲପୁର ଓ ଝାରସୁଗୁଡା ଆଦି ଜିଲ୍ଲାରୁ ମୌସୁମୀ ପ୍ରଥମେ ଫେରିବ । ଏହାର ୨ଦିନ ଭିତରେ ସାରା ରାଜ୍ୟରୁ ମୌସୁମୀ ଫେରିଯିବ ।

ଅନ୍ୟପଟେ ବାୟୁମଣ୍ଡଳର ଆର୍ଦ୍ରତା ଧୀରେ ଧୀରେ କମୁଛି । ତାପମାତ୍ରା ଏବେ ୧ରୁ ୨ ଡିଗ୍ରୀ ପର୍ଯ୍ୟନ୍ତ କମିବ । ସକାଳୁ ହାଲକା ଥଣ୍ଡା ଅନୁଭୂତ ହେବ । କିନ୍ତୁ ବିଶେଷ ଥଣ୍ଡା ଅନୁଭୂତ ହେବ ନାହିଁ । ଏ ବର୍ଷ ବିଳମ୍ବରେ ଶୀତ ଆସିପାରେ ବୋଲି କହିଛନ୍ତି ଆଞ୍ଚଳିକ ପାଣିପାଗ ନିର୍ଦ୍ଦେଶକ ଏଚ. ଆର ବିଶ୍ୱାସ ।