ତ୍ରିପୁରାରେ ରାଜନୈତିକ ହିଂସା
ତ୍ରିପୁରା (ବଡ଼ ଖବର ବ୍ୟୁରୋ):‘ବିଜେପି’ ଶାସିତ ତ୍ରିପୁରାରେ ଦେଖିବାକୁ ମିଳିଛି ନିର୍ବାଚନୀ ପରର ରାଜନୈତିକ ହିଂସା । ଦୁଇ ଦିନିଆ ଗସ୍ତରେ ତଦନ୍ତ କରିବାକୁ ଆସିଥିବା ସଂସଦୀୟ ଟିମ ଉପରେ ହୋଇଛି ଆକ୍ରମଣ । ଗତକାଲି ସନ୍ଧ୍ୟାରେ ବିସାଲଗଡର ନେହଲଚନ୍ଦ୍ର ନାଗର ବଜାରରେ ହୋଇଥିବା ଏହି ଜଘନ୍ୟ ଆକ୍ରମଣ ଯୋଗୁଁ ସଂସଦୀୟ ଦଳ ଧାର୍ଯ୍ୟ ହୋଇଥିବା କାର୍ଯ୍ୟକ୍ରମକୁ ସ୍ଥଗିତ ରଖିବାକୁ ବାଧ୍ୟ ହୋଇଛି ବୋଲି ସିପିଆଇ (ଏମ୍) ତ୍ରିପୁରା ରାଜ୍ୟ ସଚିବ ତଥା ପୂର୍ବତନ ମନ୍ତ୍ରୀ ଜିତେନ୍ଦ୍ର ଚୌଧୁରୀ କହିଛନ୍ତି।
କଂଗ୍ରେସ ଏବଂ ‘ସିପିଆଇ(ଏମ୍)’ ସୂତ୍ରରୁ ଜଣାପଡ଼ିଛି ଯେ, ସେପାହୀଜାଲା ଜିଲ୍ଲା ଅନ୍ତର୍ଗତ ହିଂସା-ପ୍ରପୀଡ଼ିତ ବିଶାଳଗଡ଼କୁ ଯାଇଥିବା ସଂସଦୀୟ ଦଳର ସଦସ୍ୟମାନଙ୍କୁ ଶାସକ ‘ବିଜେପି’ ସମର୍ଥିତ କିଛି ବ୍ୟକ୍ତି ଆକ୍ରମଣ କରିବା ସହିତ ୩ଟି ଗାଡ଼ି ନଷ୍ଟ କରି ଦେଇଛନ୍ତି। ସେହିପରି, ସଂସଦୀୟ ଦଳର ପଶ୍ଚିମ ତ୍ରିପୁରାର ମୋହନପୁର ଗସ୍ତରେ ମଧ୍ୟ ‘ବିଜେପି’ କର୍ମୀମାନେ ବାଧା ଦେଇଥିଲେ।
ଜାରି କରିଥିବା ବିବୃତିରେ ପୁଲିସ କହିଛି ଯେ, ସ୍ଥାନୀୟ ବିଧାୟକମାନଙ୍କ ସହିତ ମିଶି ସାଂସଦମାନେ ଗସ୍ତସୂଚୀଭୁକ୍ତ ନ ହୋଇଥିବା ବିଶାଳଗଡ଼ର ନେହାଲ୍ ଚନ୍ଦ୍ର ନଗର ଗସ୍ତ ଯିବା ସମୟରେ ବିରୋଧାତ୍ମକ ସ୍ଲୋଗାନ୍ର ସମ୍ମୁଖୀନ ହୋଇଥିଲେ। ସାଥିରେ ଯାଇଥିବା ପୁଲିସ ଏସ୍କର୍ଟ ଟିମ୍ ତୁରନ୍ତ ପଦକ୍ଷେପ ଗ୍ରହଣ କରି ପ୍ରତିନିଧିମାନଙ୍କୁ ନିରାପଦରେ ଉଦ୍ଧାର କରିଥିଲେ। ଘଟଣାରେ କେହି ଆହତ ହୋଇ ନାହାନ୍ତି। ଜଣେ ସନ୍ଦିଗ୍ଧଙ୍କୁ ଅଟକ ରଖାଯାଇଛି।