ସରକାର ମହାନଦୀକୁ ନିଜର ରାଜନୈତିକ ମୋହରା କରିବା ପାଇଁ ଚାହୁଁଥିଲେ: ପୃଥ୍ୱୀରାଜ ହରିଚନ୍ଦନ
ଭୁବନେଶ୍ୱର (ବଡ଼ ଖବର ବ୍ୟୁରୋ): ମହାନଦୀ ଟ୍ରିବ୍ୟୁନାଲ ସଦସ୍ୟ କ୍ଷେତ୍ର ପରିଦର୍ଶନ କରିବା ପ୍ରସଙ୍ଗକୁ ନେଇ ରାଜ୍ୟ ବିଜେପି ସାଧାରଣ ସମ୍ପାଦକ ପୃଥ୍ୱୀରାଜ ହରିଚନ୍ଦନଙ୍କ ପ୍ରତିକ୍ରିୟା । କହିଲେ ମହାନଦୀ ସମସ୍ୟାର ସମାଧାନ ମୁଖ୍ୟମନ୍ତ୍ରୀ ନିଜ ଭୁଲ ଯୋଗୁଁ ହରାଇ ସାରିଛନ୍ତି । କେନ୍ଦ୍ର ସରକାର ମଧ୍ୟସ୍ଥତା ମାଧ୍ୟମରେ ଦୁଇ ରାଜ୍ୟ ସହ ଆଲୋଚନା କରି ସମାଧାନ କରିବେ ବୋଲି ଭାବିଥିଲେ । ଦୁଇ ଦୁଇ ଥର ରାଜ୍ୟ ସରକାରଙ୍କୁ କେନ୍ଦ୍ର ସରକାର ପ୍ରସ୍ତାବ ମଧ୍ୟ ଦେଇଥିଲେ । କିନ୍ତୁ ରାଜ୍ୟ ସରକାର କେନ୍ଦ୍ର ସରକାରଙ୍କ ପ୍ରସ୍ତାବକୁ ଶୁଣିଲେ ନାହିଁ । କାରଣ ରାଜ୍ୟ ସରକାର ମହାନଦୀକୁ ନିଜର ରାଜନୈତିକ ମୋହରା କରିବା ପାଇଁ ଚାହୁଁଥିଲେ ।
ଆଉ ୨୦୧୯ ନିର୍ବାଚନ ସରିବା ପରେ ରାଜ୍ୟ ସରକାର ଏବଂ ଶାସକ ଦଳ ଉଭୟ ମହାନଦୀ ସମସ୍ୟା କଥା ଭୁଲି ଗଲେ । ଟ୍ରିବ୍ୟୁନାଲରେ ଲମ୍ବା ସମୟ ଲାଗିବ ବୋଲି ସମସ୍ତେ କହିଲା ପରେ ବି ରାଜ୍ୟ ସରକାର ଶୁଣି ନଥିଲେ । ମହାନଦୀ ଅବବାହିକା ତର୍ଜମା କରି ସମାଧାନ ହେଲା ବେଳକୁ ଆଉ ଗୋଟିଏ ପିଢ଼ି ଆସି ଯାଇଥିବ । କାରଣ ଟ୍ରିବ୍ୟୁନାଲ ଫଳ ବାହାରିଲା ବେଳକୁ ୨୦ ବର୍ଷ ଲାଗିବ କି ୩୦ ବର୍ଷ ସେ କଥା ଭଗବାନଙ୍କୁ ହିଁ କେବଳ ଜଣା । ତେଣୁ ରାଜ୍ୟ ସରକାର ନିଜର ରାଜନୈତିକ ସ୍ୱାର୍ଥ ପାଇଁ ଓଡ଼ିଶାକୁ ଏବଂ ମହାନଦୀର ଅବସ୍ଥାକୁ ସମ୍ପୂର୍ଣ୍ଣ ଅନିଶ୍ଚିତତା ଭିତରକୁ ଠେଲି ଦେଇଛନ୍ତି । ଏ କଥାକୁ ନେଇ ରାଜ୍ୟ ସରକାର ଧ୍ୱଂସାଭିମୁଖୀ ରାସ୍ତାରେ ଚାଲିଛନ୍ତି ।
ତତ୍କାଳୀନ ରମଣ ସିଂହ ସରକାର କେନ୍ଦ୍ର ସରକାରଙ୍କ ପ୍ରସ୍ତାବରେ ରାଜି ହୋଇଥିଲେ କିନ୍ତୁ ଓଡ଼ିଶା ସରକାର କହିଲେ ଆମେ ଟ୍ରିବ୍ୟୁନାଲକୁ ଯିବୁ, କେନ୍ଦ୍ର ସରକାରଙ୍କ ସହ ଆଲୋଚନା କରିବାର ନାହିଁ । ଦୁଇ ଦୁଇ ଥର କେନ୍ଦ୍ରଜଳସମ୍ପଦ ମନ୍ତ୍ରୀ ଅପେକ୍ଷା କଲେ ଏବଂ ପ୍ରସ୍ତାବ ଦେଲେ । କିନ୍ତୁ ଓଡ଼ିଶାରୁ କେହି ଗଲେ ନାହିଁ । ଆହୁରି ଦୁର୍ଭାଗ୍ୟ ଜନକ କଥା ଯେ, ସେ ସମୟରେ ରାଜ୍ୟ ସରକାରଙ୍କ ପାଖରେ କୌଣସି ତଥ୍ୟ ବି ନଥିଲା । ଯାହାକୁ ଆଧାର କରି ଆଲୋଚନା କରିଥାନ୍ତେ । ଯେଉଁଥିପାଇଁ ସେମାନେ ଆଲୋଚନାରୁ ପଛଘୁଞ୍ଚା ଦେଲେ । ତେଣୁ ଆଉ ମିଛ କହି ଡ୍ରାମା କରିବାର ସମୟ ନାହିଁ । କେନ୍ଦ୍ର ସବୁବେଳେ ସାହଯୋଗର ହାତ ବଢ଼ାଇଛି କିନ୍ତୁ ରାଜ୍ୟ ସରକାର କେବେ ବି ନିଜ ନୈତିକ ଦାୟୀତ୍ୱ ପାଳନ କାରି ନାହାନ୍ତି ।