ଟ୍ରେନ୍ ରହଣୀ ଦାବି

ଲଇକେରା (ବଡ଼ ଖବର ବ୍ୟୁରୋ): କିର୍ମିରା ବ୍ଲକ ବାଗଡିହି ରେଳଷ୍ଟେସନରେ ରାଉଲକେଲା-ଭୁବନେଶ୍ୱର ଇଣ୍ଟରସିଟି ଏକ୍ସପ୍ରେସ୍ ରହଣି ଦାବି ଉଠିଛି । ଏନେଇ ଏକ ଦାବିପତ୍ର ଷ୍ଟେସନ ମାଷ୍ଟରଙ୍କୁ ପ୍ରଦାନ କରାଯାଇଛି । କୋରୋନା ପ୍ରଭାବ ଯୋଗୁ ଗତ ୮ ମାସ ହେଲା ଟ୍ରେନ ଚଳାଚଳ ବନ୍ଦ ରହିଥିବା ବେଳେ କେତେକ ସ୍ପେଶାଲ ଟ୍ରେନ ପୁନଃ ପ୍ରଚଳିତ ହୋଇଛି । ଏଥିମଧ୍ୟରୁ ରାଉରକେଲା-ଭୁବନେଶ୍ୱର ଇଣ୍ଟରସିଟି ଏକ୍ସପ୍ରେସ ଅନ୍ୟତମ । ବାଗଡିହିକୁ କୌଣସି ବସ୍ ସୁବିଧା ନଥିବାରୁ ସହର ପର୍ୟ୍ୟନ୍ତ ଯିବାକୁ ହେଲେ ବାଗଡିହି ରେଳଷ୍ଟେସନ ହିଁ ଏକମାତ୍ର ଭରସା। ଏହି ଷ୍ଟେସନ ଉପରେ କିର୍ମିରା, ଲଇକେରା ବ୍ଲକ ଏବଂ ପଡୋଶୀ ସୁନ୍ଦରଗଡ଼ ଜିଲ୍ଲାର ସୀମାବର୍ତୀ ଅଞ୍ଚଳର ଲୋକ ନିର୍ଭର କରିଥାନ୍ତି । ଏଠାରେ ଏହି ଟ୍ରେନର ରହଣୀ କରାଗଲେ ଏହି ଅଞ୍ଚଳର ଜନସାଧାରଣଙ୍କୁ ବହୁ ସୁବିଧା ମିଳିପାରିବ ବୋଲି କୁହାଯାଉଛି । ନୱଲ ଅଗ୍ରୱାଲଙ୍କ ନେତୃତ୍ୱରେ ବିଜୟ ଶର୍ମା, ତେଜରାଜ ସାହୁ, ଲକ୍ଷ୍ମୀ ନାରାୟଣ ପଟେଲ, ସ୍ଵପ୍ନାମୟୀ ପଟେଲ, ନଟୱର ଅଗ୍ରୱାଲ, ସମିତି ସଭ୍ୟ ଏବଂ ଜନସାଧାରଣଙ୍କ ସ୍ଵାକ୍ଷରିତ ଦାବିପତ୍ର ବାଗଡିହି ଷ୍ଟେସନରେ ଷ୍ଟେସନ ମାଷ୍ଟରଙ୍କୁ ଦିଆଯାଇଛି।