ମାନବିକତା ଦେଖାଇଲେ ଆମ୍ବୁଲାନ୍ସ ଡ୍ରାଇଭର

ରାମନାଗୁଡା (ବଡ଼ ଖବର ବ୍ୟୁରୋ): ଗାଁ କୁ ରାସ୍ତା ନାହିଁ । ଆମ୍ବୁଲାନ୍ସ ପହଞ୍ଚି ପାରିନଥିଲା । ଭାରରେ ବୁହାହେଲେ ଗର୍ଭବତୀ । ଗର୍ଭଯନ୍ତ୍ରଣାରେ ଛଟପଟ ହେଉଥିବା ମହିଳାଙ୍କୁ ମାନବିକତା ଦେଖାଇଲେ ଆମ୍ବୁଲାନ୍ସ କର୍ମଚାରୀ । ରାୟଗଡ଼ା ଜିଲ୍ଲା ରାମନାଗୁଡା ବ୍ଲକ ନିଲାମଗୁଡା ପଞ୍ଚାୟତ ଡ଼ମ୍ବୁରିଗୁଡାର କୁନି ଶବର । ସୋମବାର ରାତିରେ କୁନିଙ୍କ ଗର୍ଭଯନ୍ତ୍ରଣା ଆରମ୍ଭ ହୋଇଯାଇଥିଲା । ପରିବାର ଲୋକେ ଆମ୍ବୁଲାନ୍ସକୁ ଯୋଗାଯୋଗ କରିଥିଲେ। ଆମ୍ବୁଲାନ୍ସ ଡ୍ରାଇଭର କମଳାକାନ୍ତ ପାଢ଼ୀ ଗ୍ରାମ ନିକଟରେ ପହଞ୍ଚି ଥିଲେ। ରାସ୍ତା ନଥିବାରୁ ଆମ୍ବୁଲାନ୍ସ ଅପେକ୍ଷା କରିଥିଲା । କୁନି ଆସିବାରେ ବିଳମ୍ବ ହେବାରୁ ଡ଼୍ରାଇଭର ତାଙ୍କ ଘରେ ପହଞ୍ଚିଥିଲେ । କୁନି ଯନ୍ତ୍ରଣାରେ ଛଟପଟ ହେଉଥିବା ଦେଖି ସହଯୋଗର ହାତ ବଢାଇଥିଲେ ଆମ୍ବୁଲାନ୍ସ ଡ୍ରାଇଭର କମଳାକାନ୍ତ । କୁନିଙ୍କ ସ୍ୱାମୀ ଲକ୍ଷ୍ମୀନାରାୟଣଙ୍କ ସହ କମଳାକାନ୍ତ ମହିଳାଙ୍କୁ ଆମ୍ବୁଲାନ୍ସ ନିକଟକୁ ଭାରରେ ବୋହି ଆଣିଥିଲେ । ୧୦୨ଆମ୍ବୁଲାନ୍ସ ପହଞ୍ଚିଥିଲା ରାମନାଗୁଡା ଗୋଷ୍ଠୀ ସ୍ୱାସ୍ଥ୍ୟକେନ୍ଦ୍ରରେ । ସେଠାରେ କୁନି ଏକ ପୁତ୍ର ସନ୍ତାନକୁ ଜନ୍ମ ଦେଇଥିଲେ । ମାଆ ଓ ନବଜାତକ ସୁସ୍ଥ ଥିବା ଡାକ୍ତର କହିଛନ୍ତି । ଡ୍ରାଇଭରଙ୍କ ଏଭଳି ମାନବିକତାକୁ ସ୍ୟାଲୁଟ୍ କରିଛନ୍ତି ଲକ୍ଷ୍ମୀନାରାୟଣ ।