ହେଲାନି ପ୍ରାର୍ଥୀ ପରିବର୍ତ୍ତନ, ନିରାଶ ହେଲେ ସମୀର
ଭୁବନେଶ୍ୱର (ବଡ଼ ଖବର ବ୍ୟୁରୋ): ଆଜି ବିଜେଡି ପକ୍ଷରୁ ବାକି ଥିବା ୩ ଆସନରେ ପ୍ରାର୍ଥୀ ଘୋଷଣା କରାଯାଇଛି । କୋରେଇ, ଖଣ୍ଡପଡ଼ା ଓ ନୀଳଗିରି ବିଧାନସଭା ଆସନ ପାଇଁ ପ୍ରାର୍ଥୀ ଘୋଷଣା କରିଛି ଦଳ । କୋରେଇରୁ ସଂଧ୍ୟାରାଣୀ ଦାସ, ଖଣ୍ଡପଡ଼ାରୁ ସାବିତ୍ରୀ ପ୍ରଧାନ, ନୀଳଗିରିରୁ ପ୍ରାର୍ଥୀ ହେଲେ ସୁକାନ୍ତ କୁମାର ନାୟକ । ସେପଟେ ଦେବଗଡ଼ ବିଧାନସଭା ପ୍ରାର୍ଥୀ ବଦଳାଇଲା ବିଜେଡି । ରୋମାଞ୍ଚ ରଂଜନ ବିଶ୍ୱାଳଙ୍କୁ ପ୍ରାର୍ଥୀ ଘୋଷଣା କରିଛି ଦଳ । ପୂର୍ବରୁ ବିଜେଡି ଦେବଗଡ଼ ବିଧାନସଭା ଆସନରୁ ଅରୁନ୍ଧତୀ ଦେବୀଙ୍କୁ ଟିକେଟ୍ ଦେଇଥିଲା । କିନ୍ତୁ ଆଜି ଏହି ଆସନରେ ପ୍ରାର୍ଥୀ ପରିବର୍ତ୍ତନ କରିଛି ଦଳ। ଅରୁନ୍ଧତୀ ଦେବୀଙ୍କ ସ୍ଥାନରେ ରୋମାଞ୍ଚ ରଂଜନ ହେଲେ ପ୍ରାର୍ଥୀ ।
କିନ୍ତୁ ସେପଟେ ନିରାଶ ହୋଇଛନ୍ତି ସମୀର ଦାଶ । ତାଙ୍କ ଆଶା ମଉଳି ଯାଇଛି । ବିଜେଡି ପୂର୍ବରୁ ସମୀର ଦାଶଙ୍କ ଟିକେଟ କାଟି ନିମାପଡାରୁ ଦିଲ୍ଲୀପ ନାୟକଙ୍କୁ ପ୍ରାର୍ଥୀ କରିଛି । ଟିକେଟ ପରିବର୍ତ୍ତନ ପାଇଁ ଚାପ ପକାଉଥିଲେ ସମୀର । ସମର୍ଥକଙ୍କୁ ଧରି ସଭାସମିତି ଓ ରୋଡ ସୋ’ ଜରିଆରେ ଚାପ ପକାଉଥିଲେ । ଏହି ପ୍ରାର୍ଥୀ ତାଲିକା ଘୋଷଣାରେ ଦେବଗଡରେ ପ୍ରାର୍ଥୀ ପରିବର୍ତ୍ତନ କରାଗଲା ହେଲେ ନିମାପଡାରେ କୌଣସି ପରିବର୍ତ୍ତନ ହେଲାନାହିଁ । ସମୀର ଦାଶ ୨୦୦୯ରୁ ନିମାପଡାରେ ବିଜେଡି ଟିକେଟରୁ ଜିତିଆସୁଥିଲେ । ସେ ୩ଥର ବିଧାୟକ ରହିବା ସହ ଗଣଶିକ୍ଷା ମନ୍ତ୍ରୀ ମଧ୍ୟ ରହିଥିଲେ । ହେଲେ ୨୦୨୪ ନିର୍ବାଚନ ପାଇଁ ଦଳ ତାଙ୍କ ଟିକେଟ କାଟିଛି ।