ପଥରା ଵୃଦ୍ଧାଶ୍ରମ ସଂସ୍ଥାପକଙ୍କ ଅକାଳ ବିୟୋଗ

ଓଡଗାଁ (ବଡ଼ ଖବର ବ୍ୟୁରୋ): ପରଲୋକରେ ପଥରା ଵୃଦ୍ଧାଶ୍ରମ ସଂସ୍ଥାପକ ଶଶୀ ଭୂଷଣ ଅଚାରୀ । ନୟାଗଡ଼ ଜିଲ୍ଲା ଓଡଗାଁ ନିକଟସ୍ଥ ପଥରା ମହର୍ଷି ଦୟାନନ୍ଦ ଚାରିଟେବୁଲ ଟ୍ରଷ୍ଟ ତଥା ଵୃଦ୍ଧାଶ୍ରମ ସଂସ୍ଥାପକ ଶଶୀ ଭୂଷଣ ଅଚାରୀଙ୍କ ହୃଦଘାତରେ ସୋମବାର ରାତିରେ ପରଲୋକ ହୋଇଯାଇଛି । ସେ ତିନିମାସ ତଳେ ବିଶାଖାପାଟଣାରେ ହୃଦରୋଗ ଜନିତ ଚିକିତ୍ସା ସହିତ ଅସ୍ତ୍ରୋପଚାର କରି ଘରେ ବିଶ୍ରାମ ନେଉଥିଲେ । ହେଲେ ସୋମବାର ଅସୁସ୍ଥ ହେବାରୁ ଭୁବନେଶ୍ୱର ଚିକିତ୍ସା ପାଇଁ ନେବାବେଳେ ଆକ୍ସିଜେନ ଅଭାବରୁ ହୃଦଘାତରେ ହିଁ ସେ ମୃତ୍ୟୁ ବରଣ କରିଥିବା ପରିବାର ସୂତ୍ରରୁ ଜଣାଯାଇଛି । ସେ ନିଜର ସ୍ୱଳ୍ପ ରୋଜଗାର ଓ ଲୋକ ସମ୍ପର୍କରୁ ଵୃଦ୍ଧାଶ୍ରମର ଅନ୍ତେବାସୀଙ୍କ ଭରଣ ପୋଷଣ କରୁଥିଲେ । ସ୍ବର୍ଗତ ଆଚାରୀଙ୍କ ପରଲୋକରେ ବହୁ ବିଶିଷ୍ଟ ବ୍ୟକ୍ତି ଶୋକ ବ୍ୟକ୍ତ କରିଛନ୍ତି । ଵୃଦ୍ଧାଶ୍ରମରେ ହିଁ ମଙ୍ଗଳବାର ତାଙ୍କ ମର ଶରୀରକୁ ମହାସମାଧି ଦିଆଯାଇଥିବା ପୁତ୍ର ଅରୁଣ ପ୍ରକାଶ କରିଛନ୍ତି ।