ସ୍କୁଲ ଫି’ ପ୍ରସଙ୍ଗ; ହାଇକୋର୍ଟରେ ସ୍ପଷ୍ଟୀକରଣ ଦେବେ ସରକାର

ଭୁବନେଶ୍ୱର (ବଡ଼ ଖବର ବ୍ୟୁରୋ): କରୋନା ସମୟରେ ରାଜ୍ୟରେ ବନ୍ଦ ରହିଛି ସମସ୍ତ ସରକାରୀ ଓ ବେସରକାରୀ ସ୍କୁଲ । ଅନଲାଇନରେ ଚାଲିଛି ପାଠପଢା । ସରକାରୀ ସ୍କୁଲ ଅପେକ୍ଷା ବେସରକାରୀ ସ୍କୁଲର କର୍ମଚାରୀମାନେ ଅନଲାଇନ କ୍ଲାସକୁ ଅଧିକ ଗୁରୁତ୍ୱ ଦେଉଥିବା କୁହାଯାଉଛି । କିନ୍ତୁ ଅଭିଭାବକମାନଙ୍କଠାରୁ ସ୍କୁଲ ଫି’ ଆଦାୟ କରିବାକୁ ବେସରକାରୀ ସ୍କୁଲର କର୍ମକର୍ତ୍ତାମାନେ ଆଗେଇ ଆସିଛନ୍ତି । ସେମାନେ ଏକ ପ୍ରକାର ଜୁଲମ୍ ଚଳାଇଥିବା ଅଭିଯୋଗ ହେଉଛି । ସ୍କୁଲ ବନ୍ଦ ରହିଛି, ପିଲାମାନେ ଯାଉନାହାନ୍ତି, ଫି’ କାହିଁକି ଦେବୁ ବୋଲି ଅଭିଭାବକମାନେ କହୁଛନ୍ତି ।

ସ୍କୁଲ ଫି’କୁ ନେଇ ବିବାଦ ଘନେଇବାରୁ ବାଧ୍ୟହୋଇ ବେସରକାରୀ ସ୍କୁଲଗୁଡିକର କର୍ମକର୍ତ୍ତାମାନେ ହାଇକୋର୍ଟଙ୍କ ଦ୍ୱାରସ୍ଥ ହୋଇଥିଲେ । ହାଇକୋର୍ଟରେ ଆଗତ କିଛି ଇଣ୍ଟରଭେନସନ୍ ପିଟିସନକୁ ହାଇକୋର୍ଟ ଆଜି ଅଗ୍ରାହ୍ୟ କରିଦେଇଛନ୍ତି । ସ୍କୁଲ ଫି’ ନେଇ ରାଜ୍ୟ ସରକାରଙ୍କଠାରୁ ହାଇକୋର୍ଟ ସ୍ପଷ୍ଟୀକରଣ ମାଗିଛନ୍ତି । ଆଜିଠାରୁ ୭ ଦିନ ମଧ୍ୟରେ ସ୍ପଷ୍ଟୀକରଣ କୋର୍ଟରେ ଦାଖଲ କରିବା ପାଇଁ ନିର୍ଦ୍ଦେଶ ଦିଆଯାଇଛି । ୭ଦିନ ପରେ ସ୍କୁଲ ଫି’ ଛାଡ ମାମଲାର ପରବର୍ତ୍ତୀ ଶୁଣାଣି କରାଯିବ ବୋଲି ହାଇକୋର୍ଟ ତାଙ୍କ ରାୟରେ ସ୍ପଷ୍ଟ କରିଛନ୍ତି ।