ପରଲୋକରେ ଶାନ୍ତନୁ ମହାପାତ୍ର
ଭୁବନେଶ୍ୱର(ବଡ଼ ଖବର ବ୍ୟୁରୋ): ପରଲୋକରେ ବିଶିଷ୍ଟ ସଙ୍ଗୀତ ନିର୍ଦ୍ଦେଶକ ଶାନ୍ତନୁ ମହାପାତ୍ର । ହସ୍ପିଟାଲରେ ଚିକିତ୍ସିତ ଅବସ୍ଥାରେ ତାଙ୍କର ଦେହାନ୍ତ ହୋଇଛି । ସେ ଭୁବନେଶ୍ୱର ଏକ ଘରୋଇ ହସ୍ପିଟାଲରେ ଚିକିତ୍ସିତ ହେଉଥିଲେ । ଗୁରୁତର ହେବାରୁ ରବିବାର ରାତିରେ ତାଙ୍କୁ ଆଇସିୟୁରେ ଭର୍ତ୍ତି କରାଯାଇଥିଲା । ସେ ନିମୋନିଆ ଓ କିଡନୀ ରୋଗରେ ପୀଡିତ ଥିଲେ । ୮୪ବର୍ଷ ବୟସରେ ଆଜି ତାଙ୍କ ଦେହାନ୍ତ ହୋଇଛି । ଶାନ୍ତନୁ ମହାପାତ୍ର ଓଡିଆ ସିନେମା ଜଗତର ସଙ୍ଗୀତ ଜଗତରେ ଟ୍ରେଣ୍ଡ ସେଟର ଥିଲେ । ସେ ଅନେକ କିମ୍ବଦନ୍ତୀଙ୍କ କଣ୍ଠରେ ଓଡିଆ ଗୀତ ଗାଇ ଇତିହାସ ରଚିଛନ୍ତି ।
ବାରିପଦାରେ ଜନ୍ମଗ୍ରହଣ କରିଥିବା ଏହି ପ୍ରତିଭା ଜଣେ ଜିଓଫିଜିଷ୍ଟ ଥିଲେ । ଆଇଆଇଟି ଖଡ଼ଗପୁରରୁ ପାସ କରି ଓଡିଶା ମାଇନିଂ କର୍ପୋରେସନରେ ଚାକିରୀ କରିଥିଲେ । ଏଥିସହ ଜଣେ ସଙ୍ଗୀତ ନିର୍ଦ୍ଦେଶକ ମଧ୍ୟ ଥିଲେ । ସେ ୧୯୦୦ ଗୀତର ସଂଯୋଜନା କରିଛନ୍ତି ।ସେଥିରେ ୫୩ଟି ଫିଚର ଓ ଟେଲି ଫିଲ୍ମ୍, ୧୦ଯାତ୍ରା, ୬୦ ଆକାଶବାଣୀ ନାଟକ, ୧୦ ନୃତ୍ୟନାଟିକା ରହିଛି । ସଙ୍ଗୀତ ଜଗତର ଅବଦାନ ଲାଗି ତାଙ୍କୁ ୨୦୧୧ରେ ଉତ୍କଳ ସଂସ୍କୃତି ବିଶ୍ୱବିଦ୍ୟାଳୟ ପକ୍ଷରୁ ଡିଲିଟ୍ ସମ୍ମାନରେ ସମ୍ମାନିତ କରାଯାଇଥିଲା ।
