ପଥର ଖଣିକୁ ବିରୋଧ

ମାଲକାନଗିରି, (ବଡ଼ ଖବର ବ୍ୟୁରୋ): ମାଲକାନଗିରି ଜିଲ୍ଲା ମୋଟୁ ତହସିଲ ଅନ୍ତର୍ଗତ ପେଟାପଥର ଖଣିକୁ ବିରୋଧ କରି ଆଜି ଶତାଧିକ ଆଦିବାସୀ ଲୋକ ଆନ୍ଦୋଳନ କରିଛନ୍ତି। ପୁଷୁଗୁଡ଼ା ପଞ୍ଚାୟତ ପେଟା ଗ୍ରାମ ନିକଟରେ ଥିବା ପଥର ଖଣିରୁ ଆନ୍ଧ୍ରପ୍ରଦେଶର ଜାଭା ଭେନୁ ଗୋପାଲ ଗ୍ରାନାଇଟ ନାମକ ଏକ ଘରୋଇ କମ୍ପାନୀ ଦୀର୍ଘବର୍ଷ ଧରି ଗ୍ରାନାଇଟ ପଥର ଖନନ କରି ଏହାକୁ ବିଶାଖାପାଟଣା ବନ୍ଦର ଦେଇ ଚୀନକୁ ରପ୍ତାନି କରୁଥିବା ଅଭିଯୋଗ ଆଣିଛନ୍ତି ଗ୍ରାମବାସୀ। ଏହି ପାହାଡ଼ ଖନନ ଦ୍ୱାରା ମୋଟୁ ଅଞ୍ଚଳର ଅନେକ ଗାଁରେ ସାବେରୀ ନଦୀ ପାଣି ମାଡ଼ି ଆସିବା ସହ ବର୍ଷାଦିନେ ଶହ ଶହ ହେକ୍ଟର ଧାନ ଫସଲ ନଷ୍ଟ ହେବ ବୋଲି ଗ୍ରାମବାସୀ ଅଭିଯୋଗ କରିଛନ୍ତି। ତେଣୁ ଯଥାଶୀଘ୍ର ସରକାର ଏଥି ପ୍ରତି ଦୃଷ୍ଟି ଦେଇ ଉଚ୍ଚସ୍ତରୀୟ ତଦନ୍ତ କରିବା ଲାଗି ସ୍ଥାନୀୟ ଲୋକେ ଦାବି କରିଛନ୍ତି। ତେବେ ସମସ୍ୟାର ସମାଧାନ ନ ହେଲେ ଆଗାମୀ ଦିନରେ ବିରାଟ ଆନ୍ଦୋଳନ କରାଯିବ ବୋଲି ଅଞ୍ଚଳବାସୀ ଚେତାବନୀ ଦେଇଛନ୍ତି।