ବ୍ଲକ ଅଫିସ ଆଗରେ ଧାରଣା

ଟାଙ୍ଗୀ-ଚୌଦ୍ୱାର, (ବଡ଼ ଖବର ବ୍ୟୁରୋ): କରୋନା ସମୟରେ ସରକାର ସାଧାରଣ ଲୋକଙ୍କୁ ବହୁ ସାହାଯ୍ୟ ସହଯୋଗ ଯୋଗାଇ ଦେଇଛନ୍ତି। ହେଲେ ସରକାର ଦେଉଥିବା ସାହାଯ୍ୟ ସହଯୋଗରୁ ବଞ୍ଚିତ ହୋଇଛନ୍ତି ପ୍ରକୃତ ହିତାଧିକାରୀ। ଟାଙ୍ଗୀ-ଚୌଦ୍ୱାର ବ୍ଲକ କୟଳପଡ଼ା ଗ୍ରାମ ପଞ୍ଚାୟତରେ ବହୁ ହିତାଧିକାରୀ ରାସନକାର୍ଡ ପାଇନାହାନ୍ତି। ସେମାନେ କରୋନା ସମୟରେ ନାହିଁ ନ ଥିବା ଅସୁବିଧାର ସମ୍ମୁଖୀନ ହେଉଛନ୍ତି।
ଏହି ପଞ୍ଚାୟତରେ ଗତ ତିନି ବର୍ଷ ମଧ୍ୟରେ ୧୫୦ଜଣରୁ ୧୭୦ ଜଣ ବ୍ୟକ୍ତିଙ୍କ ମୃତ୍ୟୁ ଘଟିଛି। ସେହି ମୃତ ବ୍ୟକ୍ତିଙ୍କ ସ୍ଥାନରେ ନୂଆ ହିତାଧିକାରୀଙ୍କୁ ଚୟନ କରି ରାସନକାର୍ଡ ବାଣ୍ଟିବାକୁ ସରପଞ୍ଚ ରଶ୍ମିରଞ୍ଜନ ପ୍ରଧାନ ବାରମ୍ବାର ଅଧିକାରୀଙ୍କୁ ଅବଗତ କରିଥିଲେ ମଧ୍ୟ କୌଣସି ସୁଫଳ ମିଳି ନ ଥିଲା। ଏମିତିକି ବିଡିଓ ବି କର୍ଣ୍ଣପାତ କରି ନ ଥିଲେ। ରୋଜଗାର ହରାଇ ବସିଥିବା ଏହି ପରିବାର ଲୋକମାନେ ଆଜି ସରପଞ୍ଚଙ୍କ ସହିତ ବ୍ଲକ ପରିସରରେ ଥିବା ଗାନ୍ଧୀ ମୂର୍ତ୍ତି ତଳେ ଧାରଣା ଦେବା ସହ ରାସନକାର୍ଡ ମିଳିବାର ପ୍ରତିଶ୍ରୁତି ନ ମିଳିବା ଯାଏ ଧାରଣା ଜାରି ରଖିବେ ବୋଲି କହିଛନ୍ତି।