ଜେଏନୟୁରେ ପୁଣି ଛାତ୍ର ଅଶାନ୍ତି

ନୂଆଦିଲ୍ଲୀ(ବଡ଼ ଖବର ବ୍ୟୁରୋ): ଜବାହାରଲାଲ ନେହେରୁ ବିଶ୍ବବିଦ୍ୟାଳୟରେ ଥିବା ଲାଇବ୍ରେରୀ ପରିଷରରେ କିଛି ଛାତ୍ର ଜୋର ଜବରଦସ୍ତ ପଶି ଭଙ୍ଗାରୁଜା କରିଥିବା ସୂଚନା ମିଳିଛି । ଲାଇବ୍ରେରୀ ମଧ୍ୟରେ ଲାଗିଥିବା କାଚ ଭାଙ୍ଗିବା ସହିତ ଲାଇବ୍ରେରୀରେ ଥିବା ବହି ମଧ୍ୟ ଫୋଡ଼ା ଫିଙ୍ଗା କରିଥିବା ଜଣା ପଡ଼ିଛି । ସୂଚନା ଅନୁସାରେ, କରୋନା ମହାମାରୀ କାରଣରୁ ଜେଏନୟୁ ଲାଇବ୍ରେରୀ ବନ୍ଦ ରହିଛି । ପାଠ ପଢିବା ପାଇଁ ଲାଇବ୍ରେରୀ ଖୋଲିବା ପାଇଁ କିଛି ଛାତ୍ର ଦାବି କରୁଥିଲେ ମଧ୍ୟ କଲେଜ କର୍ତ୍ତୃପକ୍ଷ ମନାକରିବା ପରେ ସେଠାରେ ହଙ୍ଗାମା କରିଥିଲେ କିଛି ଛାତ୍ର ।

ଉତ୍ତ୍ୟକ୍ତ ଛାତ୍ରମାନେ ଲାଇବ୍ରେରୀର କାଚ ଏବଂ ଅନ୍ୟାନ୍ୟ ଆସବାବପତ୍ର ଭଙ୍ଗାରୁଜା କରିଥିବା ଅଭିଯୋଗ ହୋଇଛି । ପ୍ରାୟ ୩୦ରୁ ଅଧିକ ଛାତ୍ର ଭଙ୍ଗାରୁଜା କରିଥିବା କଲେଜ କର୍ତ୍ତୃପକ୍ଷ ଅଭିଯୋଗ କରିଛନ୍ତି । ସରକାରୀ ଆଦେଶ ଉଲ୍ଲଂଘନ ଧାରା ୧୮୮ ଏବଂ ମହାମାରୀ ଅଧିନିୟମ ଧାରା ୩ ଉଲ୍ଲଂଘନ ଅଭିଯୋଗ ମାମଲା ରୁଜୁ କରି ତଦନ୍ତ ଜାରି ରଖିଛି ।