ଗୁଣିଗାରେଡ଼ି ସନ୍ଦେହରେ ଗଲା ଜୀବନ

ବୈପାରିଗୁଡା (ବଡ଼ ଖବର ବ୍ୟୁରୋ): ଗୁଣିଗାରେଡ଼ି ସନ୍ଦେହ । ଟାଙ୍ଗିଆ ଚୋଟରେ ଜଣଙ୍କୁ ହାଣିଥିବା ସନ୍ଦେହ । ଏଭଳି ଅଭାବନୀୟ ଘଟଣା ଘଟିଛି ବୈପାରିଗୁଡା ଥାନା ଧନିବାଲସା ଗ୍ରାମରେ । ମୃତକ ହେଲେ ମହାଦେବ ଖରା । ଦୁର୍ବୃତ୍ତ ଟାଙ୍ଗିଆରେ ହାଣି ହତ୍ୟା କରିଛନ୍ତି ସୂଚନା ମିଳିଛି । ଆକ୍ରମଣରେ ମହାଦେବଙ୍କ ପତ୍ନୀ ମଙ୍ଗୁଳି ଖରା ଆହତ ହୋଇଛନ୍ତି। ବୈପାରିଗୁଡା ଥାନାରେ ମଙ୍ଗୁଳି ଅଭିଯୋଗ କରିବା ପରେ ପୁଲିସ୍ ଗାଁରେ ପହଞ୍ଚି ମୃତଦେହ ଜବତ କରିଛି। ହତ୍ୟାକାଣ୍ଡରେ ସଂପୃକ୍ତ ୪ ଗ୍ରାମବାସୀ ଫେରାର୍ ଥିବା ଜଣା ପଡିଛି। ଗତକାଲି ଗ୍ରାମର ବଳରାମ ଖରାଙ୍କ ମୃତ୍ୟୁ ହୋଇଥିଲା।

ଶେଷକୃତ୍ୟ ପାଇଁ ଗ୍ରାମବାସୀ ଶ୍ମଶାନକୁ ଯାଇଥିବା ବେଳେ ମହାଦେବ ଓ ମଙ୍ଗୁଳି ମଧ୍ୟ ଶ୍ମଶାନ ଯାଇଥିଲେ। କୌଣସି କାରଣକୁ ନେଇ କିଛି ଗ୍ରାମବାସୀଙ୍କ ସହ ମହାଦେବଙ୍କ ବଚସା ହୋଇଥିଲା। ଏଥିରେ ଉତକ୍ଷିପ୍ତ ହୋଇ ଗ୍ରାମର ହରି ଖରା, ଡମ୍ବରୁ ଖରା, ଅର୍ଜୁନ ଖରା, ଅଦିଆ ଖିଲ ମହାଦେବଙ୍କୁ ଆକ୍ରମଣ କରିଥିଲେ। ମହାଦେବ ଓ ମଙ୍ଗୁଳି ଘରକୁ ଦୌଡ଼ି ପଳାଇ ଆସିଥିଲେ ମଧ୍ୟ ଆକ୍ରମଣକାରୀ ପିଛା କରି ଘରକୁ ଆସି ଟାଙ୍ଗିଆରେ ହାଣିଥିଲେ। ଫଳରେ ଘର ଭିତରେ ହିଁ ମହାଦେବଙ୍କ ପ୍ରାଣବାୟୁ ଉଡ଼ି ଯାଇଥିଲା। କୌଶଳକ୍ରମେ ମଙ୍ଗୁଳି ଆକ୍ରମଣକାରୀଙ୍କ କବଳରୁ ଖସି ଆସି ବୈପାରିଗୁଡା ଥାନାରେ ଏତଲା ଦେଇଥିଲେ।