ଭଦ୍ରକ (ବଡ ଖବର ବ୍ୟୁରୋ): କରୋନା ମହାମାରୀ ସମୟରେ ନିଜ ଅଟୋରେ ଅନେକ ପ୍ରବାସୀଙ୍କୁ ଏପରିକି କରୋନା ଆକ୍ରାନ୍ତଙ୍କୁ ବୋହିଥିଲେ । କେବଳ ଯେ ସେ ନିଜ ପରିବାର ପ୍ରତିପୋଷଣ ପାଇଁ ଅଟୋ ଚଳାଉଥିଲେ ତାହା ନୁହେଁ | ଜଣେ ଦରଦି ମଣିଷ ଭାବେ ସମସ୍ତଙ୍କ ସୁଖ ଦୁଃଖରେ ସାମିଲ ହେଉଥିଲେ । ଦିନ ଦ୍ୱିପ୍ରହର ହେଉ କି ବିଳମ୍ବିତ ରାତି ହେଉ ଯିଏ ଯେତେବେଳେ ଡାକିଦିଅନ୍ତି ଅବିଳମ୍ବେ ସେ ନିଜ ଅଟୋ ନେଇ ତାଙ୍କ ପାଖରେ ପହଞ୍ଚି ଯାଆନ୍ତି । ରୋଗୀଙ୍କୁ ମେଡିକାଲରେ ପହଁଞ୍ଚାଇବା ସହ ସେମାନଙ୍କର ଭଲ ମନ୍ଦ ବୁଝିବା, ସାହାଯ୍ୟ କରିବାକୁ ମଧ୍ୟ ପଛାଇ ନଥାନ୍ତି ।
ସଦାସର୍ବଦା ନିଜ ପରିବାରକୁ ପଛରେ ପକାଇ ସାମାଜିକ କାର୍ଯ୍ୟକ୍ରମରେ ନିଜକୁ ସାମିଲ କରିଥାନ୍ତି ଏହି ଅଟୋ ଚାଳକ । ଗାଁର ଯେକୌଣସି ଆନୁଷ୍ଠାନିକ କାର୍ଯ୍ୟକ୍ରମ ହେଉ ଅଥବା ସାମାଜିକ ସଂଗଠନ ସହ ମିଶି କାର୍ଯ୍ୟକରିବା ହେଉ ସବୁଥିରେ ଆଗଭର ହୋଇ କାମ କରୁଥିଲେ । ଭଦ୍ରକ ଜିଲ୍ଲା ତିହିଡି ବ୍ଲକ ଅଚକ ପଂଚାୟତ ନନ୍ଦପୁର ଗ୍ରାମର ସୁକଦେବ ନାଥଙ୍କ ପୁଅ ମନୋଜ କୁମାର ନାଥ | ଗତ ସପ୍ତାହରେ ଥଣ୍ଡା ଜ୍ୱର ହେବାରୁ ସେ ଡାକ୍ତରୀ ଚିକିତ୍ସା କରାଇଥିଲେ । ପରେ କୋଭିଡ୍ ପରୀକ୍ଷା କରିବା ପରେ ଆକ୍ରାନ୍ତ ହୋଇଥିବା ଜଣାପଡିଥିଲା । ତାପରେ ତାଙ୍କୁ ଭଦ୍ରକ କଲେଜ କୋଭିଡ୍ କେୟାରରେ ଭର୍ତ୍ତି କରାଯାଇଥିଲା । ହେଲେ ଚିକିତ୍ସାଧିନ ଅବସ୍ତାରେ ତାଙ୍କର ଦେହାନ୍ତ ଘଟିଛି ।
ଏପରିକି ତାଙ୍କର ମରଶରୀର ନିଜ ଭିଟାମାଟି ଆସିପାରି ନଥିଲା । ପ୍ରଶାସନ ପକ୍ଷରୁ ଶେଷ କୃତ୍ୟ ସମ୍ପନ୍ନ କରାଯାଇଛି । ବର୍ଷକ ତଳେ ମନୋଜଙ୍କ ସ୍ତ୍ରୀ ଏକ ଅଜଣା ରୋଗରେ ଆକ୍ରାନ୍ତ ହୋଇ ପ୍ରାଣ ହରାଇ ଥିବାବେଳେ ଏବେ ମନୋଜଙ୍କ ଆକସ୍ମିକ ମୃତ୍ୟୁ ତାଙ୍କ ପରିବାରରେ କଳାମେଘ ସଦୃଶ ଢାଙ୍କି ହୋଇ ପଡିଛି । ମନୋଜଙ୍କର ୨ଟି ଝିଅ ଓ ଗୋଟିଏ ପୁଅ ଏବେ ବାପା ମାଆଙ୍କୁ ହରାଇ ସମ୍ପୂର୍ଣ୍ଣ ବେସାହାରା ହୋଇ ଯାଇଛନ୍ତି । ଏହି ୩ ବେସାହାରା ସନ୍ତାନଙ୍କୁ ପ୍ରଶାସନ ପକ୍ଷରୁ ତୁରନ୍ତ ସରକାରୀ ସହାୟତା ଯୋଗାଇ ଦେବା ସହ ପିଏମ କେୟାର ଯୋଜନାରେ ସାମିଲ କରିବା ଲାଗି ସ୍ଥାନୀୟ ଲୋକେ ଦାବି କରିଛନ୍ତି ।
