ସେପ୍ଟେମ୍ବରରେ ୨ ବର୍ଷରୁ ଅଧିକଙ୍କୁ ଦିଆଯିବ ଟିକା
ନୂଆଦିଲ୍ଲୀ (ବଡ଼ ଖବର ବ୍ୟୁରୋ): ସେପ୍ଟେମ୍ବର ସୁଦ୍ଧା ୨ ବର୍ଷରୁ ଅଧିକ ବୟସ୍କ ପିଲାଙ୍କ ନିମନ୍ତେ ‘କୋଭାକ୍ସିନ୍’ ଟିକା ମିଳିଯିବ ଏନେଇ ମଙ୍ଗଳବାର ଦିନ ଦିଲ୍ଲୀ ‘ଏମସ୍’ର ନିର୍ଦ୍ଦେଶକ ଡାକ୍ତର ରଣଦୀପ ଗୁଲେରିଆ ଗଣମାଧ୍ୟମକୁ କହିଛନ୍ତି। ଫୁସଫୁସ୍ ଏବଂ ଶ୍ବାସପ୍ରଶ୍ବାସ ରୋଗ ସମ୍ବନ୍ଧୀୟ ପ୍ରବୀଣ ବିଶେଷଜ୍ଞ ତଥା ଭାରତ ସରକାରଙ୍କ କୋଭିଡ-୧୯ ଟାସ୍କ୍ ଫୋର୍ସର ବିଶିଷ୍ଟ ସଦସ୍ୟ ଡାକ୍ତର ଗୁଲେରିଆ ଗଣମାଧ୍ୟମକୁ କହିଛନ୍ତି, ୨ ଓ ୩ ୟ ପର୍ଯ୍ୟାୟ ପରୀକ୍ଷା ପରେ ସେପ୍ଟେମ୍ବର ସୁଦ୍ଧା ପିଲାମାନଙ୍କ ପାଇଁ ଉଦ୍ଦିଷ୍ଟ ‘କୋଭାକ୍ସିନ୍’ର ତଥ୍ୟାବଳୀ ମିଳିଯିବ ଏବଂ ସେହି ମାସରେ ହିଁ ଟିକା ପ୍ରୟୋଗ ପାଇଁ ଅନୁମୋଦନ ଦିଆଯିବ ବୋଲି ଆଶା କରାଯାଉଛି ।
ସେ ଆହୁରି ମଧ୍ୟ କହିଛନ୍ତି, ଭାରତରେ ଯଦି ‘ଫାଇଜର୍-ବାୟୋଏନ୍ଟେକ୍’ ଟିକାକୁ ଅନୁମୋଦନ ମିଳିଯାଏ, ତାହା ପିଲାମାନଙ୍କ ପାଇଁ ବିକଳ୍ପ ହୋଇପାରିବ। ଟିକା ପରୀକ୍ଷା ନିମନ୍ତେ ଦିଲ୍ଲୀ ‘ଏମସ୍ ’ ପିଲାମାନଙ୍କୁ ଚୟନ କରି ସାରିଛି। ଜୁନ ୭ ରୁ ଆରମ୍ଭ ହୋଇଥିବା ଏହି ଚୟନ ପ୍ରକ୍ରିୟାରେ ୨ ରୁ ୧୭ ବର୍ଷ ବୟସ୍କ ପିଲାଏ ଅନ୍ତର୍ଭୁକ୍ତ ଅଛନ୍ତି। ସର୍ବନିମ୍ନ ଦୁଇ ବର୍ଷ ବୟସ୍କ ଶିଶୁଙ୍କ କ୍ଷେତ୍ରରେ ଦ୍ବିତୀୟ ଏବଂ ତୃତୀୟ ପର୍ଯ୍ୟାୟ ‘କୋଭାକ୍ସିନ୍’ ପରୀକ୍ଷା ନିମନ୍ତେ ‘ଡିସିଜିଆଇ’ ମେ ୧୨ ତାରିଖ ଦିନ ‘ଭାରତ ବାୟୋଟେକ’କୁ ଅନୁମତି ଦେଇଥିଲେ।