ହାର ମାନିଲେନି ମାସୁଦ, ଦେଲେ ଯୁଦ୍ଧ ଡାକରା
କାବୁଲ(ବଡ଼ ଖବର ବ୍ୟୁରୋ): ଆଫଗାନିସ୍ତାନକୁ ଜବରଦଖଲ କରିଥିବା ତାଲିବାନ ପଞ୍ଜଶିରକୁ ଦଖଲ କରିଥିବା ନେଇ ଦାବି କରିଛି । ହେଲେ ଏହାକୁ ଖଣ୍ଡନ କରିଛନ୍ତି ଏନଆରଏଫର ମୁଖ୍ୟ ଅହମଦ ମାସୁଦ । ତାଲିବାନକୁ କଡା ଟକ୍କର ଦେଇ ଆଫଗାନୀଙ୍କୁ ଏକାଠି ହେବାକୁ ଆହ୍ୱାନ ଦେଇଛନ୍ତି । ଏଥିସହ ପାକିସ୍ତାନ ଓ ତାଲିବାନ ମିଳିତ ଭାବେ ପଞ୍ଜଶିର ଉପରେ ଆକ୍ରମଣ କରିଥିବା ନେଇ ସେ କହିଛନ୍ତି ।
ମାସୁଦ ନିଜେ ଫେସବୁକରେ ନିଜର ଏକ ଭିଡିଓ ସେୟାର କରି କହିଛନ୍ତି , ପଞ୍ଜଶିରରେ ନ୍ୟାସନାଲ ରେଜିଷ୍ଟାନ ଫ୍ରଣ୍ଟ ବିଭିନ୍ନ ସ୍ଥାନରେ ମୁତାୟନ ହୋଇଛନ୍ତି ଓ ସେମାନେ ତାଲିବାନୀଙ୍କ ବିରୋଧରେ ଲଢେଇ ଜାରି ରଖିଛନ୍ତି । ପଞ୍ଜଶିରରେ ଥିବା ଆଫଗାନଙ୍କ ଉପରେ ପାକିସ୍ତାନ ସିଧାସଳଖ ଆକ୍ରମଣ କରିଛି । ସାରା ବିଶ୍ୱ ଏବେ ତାଲିବାନ ବିରୋଧରେ ଚୁପ ରହିଛି । ହେଲେ ଆମେ ଆମ ଲଢେଇ ଜାରି ରଖିବୁ । ଶେଷ ରକ୍ତ ବିନ୍ଦୁ ପର୍ଯ୍ୟନ୍ତ ଆମେ ଆମ ଲଢେଇ ଜାରି ରଖିବୁ ।
ମାସୁଦ ଟୁଇଟ ଜରିଆରେ ନିଜ ବାର୍ତ୍ତା ଦେଇଛନ୍ତି ଯେ, ଆପଣମାନେ ସମସ୍ତେ ନିଜର ଧର୍ମ,ନିଜର ସମ୍ମାନ ଓ ନିଜର ଦେଶ ପାଇଁ ଲଢେଇ କରନ୍ତୁ । ନିଜର ସ୍ୱାଧୀନତା କେବେ ବି କାହା ହାତରେ ଟେକି ଦିଅନ୍ତୁ ନାହିଁ । ତେବେ ନ୍ୟାସନାଲ ରେଜିଷ୍ଟାନ୍ସ ଫ୍ରଣ୍ଟର ମୁଖପାତ୍ର ଫୈମଙ୍କ ଅନେକ କମାଣ୍ଡରଙ୍କ ମୃତ୍ୟୁ ଘଟିଥିବା ନେଇ ସୂଚନା ମିଳିଛି ।
