ଗଜପତି (ବଡ଼ ଖବର ବ୍ୟୁରୋ): ଏସିଏଫ ସୌମ୍ୟ ମୃତ୍ୟୁ ମାମଲାରେ ଗଜପତି ଡିଏଫଓଙ୍କ ପାଇଁ ଅଡୁଆ ବଢିଲା । ଡିଏଫଓଙ୍କର ହୋଇପାରେ ଲାଏ ଡିଟେକ୍ସନ ଟେଷ୍ଟ । ଆବଶ୍ୟକ ପଡ଼ିଲେ ଡିଏଫଓ ସଂଗ୍ରାମ କେଶରୀ ବେହେରାଙ୍କର ଲାଏ ଡିଟେକ୍ସନ ଟେଷ୍ଟ କରାଯିବ ବୋଲି କହିଛନ୍ତି କ୍ରାଇମବ୍ରାଞ୍ଚ ଡିଏସପି । ସୌମ୍ୟ ମୃତ୍ୟୁ ମାମଲାରେ ତଦନ୍ତକୁ ଜୋରଦାର କରିଛି କ୍ରାଇମବ୍ରାଞ୍ଚ । ପ୍ରତିଦିନ ମାରାଥନ ଜେରା ପରେ ଶନିବାର ଅଷ୍ଟମ ଦିନରେ ପାଳି ପଡ଼ିଥିଲା ଡିଏଫଓଙ୍କର । ଶନିବାର ସକାଳ ସାଢେ ନଅଟାରେ ପୋଲିସ ଗେଷ୍ଟ ହାଉସରେ ପହଁଚିଥିଲେ ଡିଏଫଓ ବାବୁ ।
ସେଠାରେ ତାଙ୍କୁ ତିନିଘଣ୍ଟା ଧରି ମାରାଥନ ଜେରା କରିଥିଲା କ୍ରାଇମବ୍ରାଞ୍ଚ । ବିଶେଷକରି ମୃତ୍ୟୁକାଳୀନ ଜମାନବନ୍ଦି ରେକର୍ଡ ବେଳେ କାହିିଁକି ସେଠାରେ ଡିଏଫଓ ଉପସ୍ଥିତି ଥିଲେ ସେ ଦିଗରେ ପଚରାଉଚରା କରିଥିଲା ତଦନ୍ତକାରୀ ସଂସ୍ଥା । ତେବେ ଜମାନବନ୍ଦି ରେକର୍ଡ ବେଳେ ସେଠାରେ ଡିଏଫଓ ଉପସ୍ଥିତି ଥିବା ନେଇ ଖୋଦ ସ୍ୱୀକାର କରଥିବା ମଧ୍ୟ କ୍ରାଇମବ୍ରାଞ୍ଚ ଡିଏସପି ସୂଚନା ଦେଇଛନ୍ତି । ଅନ୍ୟପଟେ ଜମାନବନ୍ଦି ରେକର୍ଡ ବେଳେ ଡିଏଫଓ ସେଠାରେ ଥିଲେ କି ନାହିଁ ବୋଲି ଗଣମାଧ୍ୟମ ଯେତେବେଳେ ଡିଏଫଓଙ୍କୁ ପଚାରିଥିଲା ସେ ଏହାକୁ ଖଣ୍ଡନ କରିଥିଲେ । ଖାଲି ଖଣ୍ଡନ କଲେନି ଗଣମାଧ୍ୟମକୁ ଠେଲି ପଳାଇଥିଲେ ।
ସେପଟେ ଡିଏଫଓଙ୍କୁ ଜେରା ପରେ ଏବେ ସ୍କାନରରେ ବିଦ୍ୟାଭାରତୀ । ବିଦ୍ୟାଙ୍କୁ ଖୁବଶୀଘ୍ର ଜେରା କରାଯିବ ବୋଲି କ୍ରାଇମବ୍ରାଞ୍ଚ ସୂଚନା ଦେଇଛି । ସୌମ୍ୟ ମୃତ୍ୟୁକୁ ୪୦ଦିନରୁ ଅଧିକ ଦିନ ବିତିଯାଇଥିଲେ ସୁଦ୍ଧା ଏଯାଏଁ କୌଣସି ନିସ୍କର୍ଷ ବାହାରି ପାରିନାହିଁ । ସୌମ୍ୟ ପଡିଲେ କେମିତି ? ଏହା ହତ୍ୟା, ଆତ୍ମହତ୍ୟା ନା ଦୁର୍ଘଟଣା ତାହା ଏଯାଏଁ ସ୍ପଷ୍ଟ ହୋଇନାହିଁ । ଅନ୍ୟପଟେ ବିଦ୍ୟାଭାରତୀ ଓ ଡିଏଫଓଙ୍କ ଭିତରେ କଣ ସମ୍ପର୍କ ରହିଛି, ଜାଣି ଶୁଣି ସୌମ୍ୟଙ୍କୁ ରାତି ଡିଉଟି କଣ ପାଇଁ ପଠାଉଥିଲେ ବୋଲି ଡିଏଫଓଙ୍କୁ ଜେରାରେ ପଚାରିଥିଲା କ୍ରାଇମବ୍ରାଞ୍ଚ । ଯାହାକୁ ଖଣ୍ଡନ କରିବା ସହ ବିଦ୍ୟାଙ୍କ ସହ କୌଣସି ସମ୍ପର୍କ ନଥିବା ଡିଏଫଓ କହିଥିଲେ । ସେପଟେ କିନ୍ତୁ ଡିଏଫଓ ସବୁ ଜାଣିଶୁଣି ଚୁପ ରହୁଥିବା ଅଭିଯୋଗ କରିଛନ୍ତି ସୌମ୍ୟଙ୍କ ବାପା ।
ସୌମ୍ୟ ମୃତ୍ୟୁକୁ ବିତିଲାଣି ୪୦ଦିନ । ପ୍ରଥମେ ଗଜପତି ପୋଲିସ ଆଉ ଏବେ କ୍ରାଇମବ୍ରାଞ୍ଚ ଏହି ମାମଲାର ଖୋଳତାଡ କରୁଛନ୍ତି କିନ୍ତୁ ଘଟଣା ଉପରୁ ଏଯାଏଁ ପରଦା ହଟୁନି । ଏହି ମାମଲାରେ ଅନେକ ବଡ଼ବଡ଼ିଆ ହାତ ଥିବାରୁ ଜାଣିଶୁଣି ସଠିକ ଦିଗରେ ତଦନ୍ତ କରାଯାଉନି ବୋଲି ଅଭିଯୋଗ କରିଛନ୍ତି ସୌମ୍ୟଙ୍କ ପରିବାର । ତେବେ ଏସବୁ ଭିତରେ ଦେଖିବାକୁ ବାକି ରହିଲା କେବେ ଏହି ମାମଲା ଉପରୁ ପରଦା ହଟାଉଛି କ୍ରାଇମବ୍ରାଞ୍ଚ ।
